Nimin, Zirtawpni khan Government Hrangbana College chuan an zirlai kâi tharte lawmna Fresher Social leh MZU a ti ṭha te lawmpuina, The Golden Hall-ah an hmang a. Lalrinpuii, Health, Social Welfare leh Women & Child Welfare Minister-in khuallian niin a hmanpui.
He hunah hian Principal Lalthlengliana Hrahsel in report pe in, Hrangbana College ah hian Department 10 awm in, kum 2024 ah zirlai thar 647 an admit a, zirlai zawng zawng 1683 an awm thu sawiin, Mizoram University 2024 exam ah Mizoram sawrkar hnuaia College ah ti ṭha ber niin 80.05% in an pass thu a sawi bawk. Hrangbana College hi July ni 22, 1980 ah din niin zirlai hlawhtling tak tak awm tawh in, Minister leh sawrkar hnathawk pawimawh tak tak an awm thu a sawi.
He programme a Khuallian Lalrinpuii, Hrangbana College a first batch zirlai chhuak chuan, 2024 Mizoram University Hrangbana College-in Under Graduate result ṭha tak an nei chu lawmawm a tih thu sawiin kum dangah pawh chhunzawm zel turin a chah a. College zirlai thar te chu an lehkha zir lai mai bakah co curricular activities a inhmanna a tam in, puitlin zirna atan hmang tura chah in, lehkhathiam chuan engkim mai an hrethiam in an pawm thiam vek mai ṭhin a ni, a ti a.
Tun Ministry hian ‘A-Z road map siam in, chuta an ngaih pawimawh em em chu ‘Ruihhlo do’ a ni tiin, Sawrkar lakluh a nih pawhin Chief Minister in TBCC centre a tlawh nghal thu a sawi. A department chan Social Welfare in Demand Reduction buaipui in, ruihhlo do tura din State Level Core Committee chuan theihtawp a hma la in, zirna in ah te awareness campaign neih zel a tum a, hnam hmelma ruihhlo lakah ṭhalaite fihlim zel se, a duh thu a sawi a. Mizo ṭhalaite nunna tam tak suata nunphung pangngai zawh thei lova siamtu ruihhlo leh a kaihhnawih do leh tih rêm kawnga sawrkarin hma a lâknaah ṭhahnem ngai taka sawrkar thawhpui turin Hrangbana college zirlaite leh thawktute zawng zawng a sâwm a, he college-in kum tina an tih chhuah 43rd Annual Magazine ‘Herhse’ chu Rinpuii hian a tlangzarh nghal bawk.
He hunah Mizoram University exam 2024 a Hrangbana College a top 10-a lang zirlai mi 25 hnenah hian he College bul tumtu Hrangbana (L) chhungkua te tum in Hrangbana Award leh pawisa fai Rs. 1000 ṭheuh hlan niin, he College aṭanga mark hnu sâng ber K. Malsawmkima, Department of Commerce hnenah, he College a principal ni rei ber R. Zatlaia te chhungkaw tum R.Zatlaia Award leh pawisa fai Rs. 10,000 hlan a ni a, Department tina mark hmu sâng ber hnenah Department hrang hrang a lo thawk tawh te pension ten an tum Departmental Award Rs. 2,000 ṭheuh hlan an ni bawk.