- K. Hmingthankaia
Tun kum, 2024-a Sawrkar sikul naupang lehkhabu, sikul luhtirha an sem kim theihloh chhan hi, Sawrkar sawi ang hi a nih chuan ava lawmawm ve. Sikul naupang lehkhabute hi kum hmasa lama Sawrkar sikula naupang inziaklut zat enzawna chhut thin a ni. Kumtin Sawrkar sikula lut an tlem tial tial chung pawhin, Sawrkar hmasa lamah kha chuan lehkhabu an chhu daih ngai lova, a hun takah an sem thei ngai thin hek lo niin kan lo hre thin a nih kha. Mipui phun thawm pawh Chanchinbu lamah kan lo hmu thin.
Tun Sawrkar tharah chuan a hun takah an sema, mahse, an semkim vek nghal thei bik lo. A chhanchu, Kum hmasa lama sikula inziaklut aia sangkhat(1000)a tam an chhu chung pawhin, school 1270 laiin an la changkim thei chuang lo tih a chhutu Department, Printing and Stationery changtu Ministerin a sawi. Hemi awmzia chu, tun kum, 2024 hian Sawrkar sikula inziaklut an pung ta hle tihna a ni. A lawmawm hle.
Tunhma lama Sawrkar sikul naupangin tlem lam an pan tial tial laia, tun ZPM Sawrkar thara Sawrkar sikulnaupang an pung ta thut hi enge a chhan ni thei ang?
- He Sawrkar tharah hian mipuite hian rinna kan nghat ngama, Sawrkar sikul pawh fate luhna tlakah kan ngai ta a ni thei.
- Mihring kan lo pung ve deuh ta a, mahse, Private sikula lut pha ve lo mirethei kan lo pung ta sawt a ni thei.
- Raltlan naupangte Sawrkar sikula lut an tam a ni thei bawk.
Engpawhnise, tun kuma Sawrkar sikula naupang lut an tam ta hi a lawmawm hrim hrim a ni. Tin, zirlaibu chhu tura Mizoram Sawrkar ta ngei an hmang hi a tha hle a ni. Tun hmaa tute emaw hlawk tel ve na tur remchang zawn vanga, phailam leh private chhuttir thin kha chu a muang thei thin hle a nih kha.
Opposition ho pawh khan Sawrkar tihmualpho na remchang hmufuh inti takin rak chiam chiam suh u. Ram tana thil tha lamahte hi chuan rilru dik pu ve ula, Mizoram hi in ram ve tho a nih hi. Social media lama intitawngkamthiam taka Sawrkar in diriam dante hi a zahthlak. Zirlaibute hi sikul luh hnua naupang zat mila chhut a ni ngailo tih te hi hriat ve tur. Mizorama Sawrkar sikul naupang zawng zawng hnena sem theih tura buatsaih peih feldiam tur hian, ni hnih khat chauh ni lovin, hun rei tak a ngai tihte hi i hrethiam tlang teh ang u. Kan vaiin thil thaah hi chuan rilru hmunkhatin i awm ang u.