Nimin, pathianni chhun khan K. Sapdanga, DM & R Minister chuan a bial chhung Edenthar vengchung lama lei chetna hmun a tlawh a, Er. Lalhriatpuia, Aizawl DC leh Official ten an ṭawiawm.
Edenthar Local Council leh YMA ten Minister hi an lo dawngsawng a, in pakhat ṭhiah nghal a ngaih avangin Edenthar khawtlang chuan hnatlang an ko nghal a, Minister chuan hnatlang thingpui lumna senso atan DM & R Department sum aṭangin khawtlang hruaitute hnenah Rs.10000 a hlan nghal bawk. .
Edenthar vengchhak lam lei che vang hian chhungkaw eng emaw zat an inthiar chhuak a, Minister chuan khawtlang hruaitute hnenah mahni in chhuahsan chhungkua te chu BSUP Building Edenthar lamah an awmna tur ngaihtuah sak nghal an nih tur thu a hrilh a, a theih anga hma lo la turin khawtlang hruaitute hi a chah nghal bawk.
Edenthar lei chetna hmunah hian lung lian tak tak lum mai thei tur a awm a, Aizawl DC leh DM & R Department ruahmannain heng lung te hi thenfai a nih theihna turin hmalak nghal a ni a, Local Council leh YMA pawhin Department hmalakna an ṭawiawm ṭha hle a ni.