Agri & Horti Fare 2024 hmanga Delhi-a cham mek Dr. K.C. Lalmalsawmzauva, Adviser to Chief Minister chuan nimin khan Union Minister pahnih leh sawrkar laipuia Official pawimawh thenkhat an Office-ah a kawm.
Adviser to CM chuan Railway Minister, V.Sommanna hnenah Mizoram thlai tharte rail hmanga man tlawm zawka thawn chhuah a nih theih nan rawtna a thlen a, Minister chuan Sawrkar laipui scheme pawimawh tak, Kisan Train chu a tawp tak avangin Mizoram thlai tharte chu Bairabi atanga parcel Van hmanga phai lama thawn theih a beisei thu a lo hrilh a ni.
Adviser to Chief Minister hian Civil Aviation Minister Murlidhar Mohol pawh a Office-ah hmuin thlai leh thei chhe awlsam chi te thlawhna hmanga man tlawm zawka thawn chhuah a nih theih nan rawtna a thlen a, Chief Minister DO letter a hlan nghal bawk. Civil Aviation Minister bakah Dr.K.C Malsawmzauva hian Civil Aviation Ministry-a Secretary hna chelh mek Vumlunmang Vualnam a hmu bawka, Krishi Udhan scheme 2.0 tangkai zawka kalpui a nih theih dan tur leh Lengpui Airport Kaltlanga Mizoram thlai leh thei tharchhuah chhe hma chite thawn chhuahna zung zung theih dan tur an sawi ho a ni.
Dr. KC-a hian thlai thar thawnchhuah lama hmalatu lian ber, APEDA Chairman chu a Office-ah hmuin Mizoramin sawhthing tam tak a thar dawn avanga hralhna market lama harsatna awm thei leh a sutkian dan turte a sawipui a, APEDA Chairman Abhishek Dev chuan sawhthing processing atan Common Facility Centre tur rawtna chu tha a tih thu leh DPR submit turin Adviser to CM hi thurawn a lo pe a ni. Thlai thar leituten Mizoram an hmelhriat theih nan leh market tha tak a awm theih nan Buyer – Seller Meet neih an duh thu sawiin APEDA Chairman chuan, November thla vela Meet neih a nih theih nan, hma la turin a staff-te Mizormah a rawn tirh thuai tur thu a sawi bawk.
Adviser to Chief Minister Dr.K.C Malsawmzauva hi Lalhmingmawia Addl Director, Horti-in a tawiawm a ni.