ZPM party in nimina an party office-a chhung inkhawm hun an neihah, Er. Ginzalala, Adviser to Chief Minister-in thusawina hun a hmang a. Er. Ginzalala chuan,”ZPM hi kan indin tirh atangin Pathian kaihhruaina kan dawng nasa hle in ka hria a, a tir atanga tun thlengin kuthnathawktute dinchhuahna hi kan din chhan a la ni reng a ni. Pathian zarah rorelna kan chang ve a, beihna pawh kan tawk chho ve ta zel a, hengte hi dawnsawn kan thiam a ngai hle a ni,” a ti.
“Sawiselna zawng zawng hi kan haw tur a ni lo, min beitute hi chi hnih chi thum lai an ni ve thei a, a then chu kan party tana thahnemngai tak leh ram hmangaihtu tak takte an ni thei a, hengho hian thil dik ti turin min beisei a, min zilh a ni. Thenkhat erawh chu min ertu leh min hawtute an ni thei a, a dawnsawn danah ringtu kan ni tih hrereng ila, Isua zirtirna hrerengin ringtu kan nihna kan lantir zel a pawimawh, in siam thatna hmanruaah kan hman thiam a ngai a ni,” a ti bawk.
Adviser to Chief Minister chuan,“ZPM policy laimu chu sustainable development a la ni fan a, mimal hnena pawisa leh therhlo tlemte te in sem hi a sustainable lo a ni. Bung thar kai turin kan inbuatsaih a, party mi leh sate pawh kalphung thar kan au pui ang ngeiin kan intih thianghlim a ngai a ni. Engkim hi vawi leh khatah a thar vel thei lo tih chu a hrechiangtu kan ni a, chutih laiin min beitute chuan engkim thar nghal vek turin an beisei a, hengte hi chu politics ruihchilhte an ni,” a ti a.
“Tunah hian kan thenawm ramah zohnahthlak unaute an buai hle a, harsatna nasa tak an tawk a, keini lo chu belh tur an nei lo, hengte hi rilru puitling taka kan lo dawnsawn a tul a, fa u ni turin Pathianin min ruat a, thlei bik leh duhsak bik nei lovin tha takin kan lo dawnsawng tur a ni. Pathian malsawmna kan dawnte kan mihringpuite chunga kan lantir hi Pathian hnen kan thlen theihna tura kailawn pawimawh tak a ni zel dawn a ni,”a ti bawk.
“Kan ram politics hi a lo bawlhhlawh hman hle mai a, kuthnathawktuten rim takin thawk mah sela intodelhna leh hmasawnna tak tak an hmu thei si lo va, ram rorel dan a dik lo tih hriain tunah chuan mipuite pawn loh theih lovin pilitics an ngaihven a lo tul ta a ni. Politics Kalphung tharah beiseina thar neiin phur takin hna an thawk a, an beiseina hi kan ti beidawng thiang lo va, chuvangin kan mawhphurhna a sang hle a ni,” a ti bawk a ni.
He hun hi R. Lalchhuanmawia, PAC member-in kaihruaiin C. Lalengliana, Sr. Vice President, Upa Committee-in hunserh a hmang a, K. Laltluangkima, Spokesperson-in thusawina hun a hmang bawk.