BJP Mizoram state chuan nimin khan an party office-ah karthar inhlanna leh Political Session hun hmangin, Malsawmtluanga, State General Secretary-in inkhawm a kaihruaia, Lalrintluanga Hnamte, State Kisan Morcha President-in hunserh a hmang.
He huna thusawitu Vanlalhmuaka, BJP Mizoram State President chuan, “Union Minister ten min rawn tlawh leh ta zeuh zeuh a, Central Minister-te hian Mizoram dinhmun dik tak hriat chian zel an duh tih hriat hi a lawmawm hle a, Mizorama Kuthnathawktute & loneitute hian Development tak tak an hmuh loh chuan hmasawnna tak tak a thleng thei lo tih hi kan hriat nawn a ngai a ni. Chuvangin Mizoram Sorkar pawh hian ṭawngka chauh ni lova Kuthnathawka eizawngte hi kan ngaihsak an ngai a, kuthnathawktu & Loneitu te tan inkalpawhna ṭha Central Sorkarin min siamsak chungchang ah pawh chak zawka hma la a, kan thlai thar chhuahte mipui hnenah man man zawka kan hralh theih nana thar chhuaktute leh a leitute hamṭhatna thleng phak hi ngaihtuah tel a ngai ta hle a ni,” a ti.
Hmuaka chuan, “BJP kan din chhan leh kan awm chhan; Mizoram leh Mizote tan a nih avangin kan State hmasawnna kawnga kan tih theih awm ah BJP Mizoram chu kan tlanchhe dawn lova, kan din chhan tihhlawhtlinna turin theihtawp kan chhuah zel dawn a ni,” a ti a.
“Union Minister rawn zin te’n, ‘BJP-in eng harsatna nge kan tawh?’ tih min zawt ṭhin a, BJP leh Kristianna inmil lo anga Mizorama kan ngai ṭhin chu, mak an tih thu an sawi fo ṭhin a, Politics-a inbeihna mai mai a nih zia an sawi ṭhin. Nimahsela Mizoram mipuite chuan kan hrefiah hleithei chuang lova, amaherawhchu a nawlpui anga kan hriatfiah hunah erawh duh aiin kan tlai mai ang tih erawh hlauhawm tak a ni thung. Vawiinah chuan Mizoram mipuite hian Mizo thuam kan inbela, kan chhungrilah erawh kan inbel tello ang tih a hlauhawm a ni. Chuvangin Mizo nun zemawi hi a sawia sawi lova, kan nun zawkin a ken tel hun ah erawh Zoram nuam kan siam ngei dawn a ni,” a ti bawk.
Inkhawmah hian Lalthangmawii, State General Secretary chuan Union Minister-in a tun hnaia Mizoram a rawn tlawh chungchang Report a pe bawk.