LZ Juice MPL 11 chu thawhtanni khan RG Stadium-ah round 4 khelh tan a ni. Thawhtannia inkhel hnuhnung zawkah round 3-ah SYS FC hneh lova tlawm Mizoram Police FC an insiamtha a, si thum faiin chawnpui FC an hneh. Thawhtannia inkhel hmasa zawkah point la hmu lo FC Bethlehem chuan season thara chetha tak SYS FC an chelh a, point khat an hmu.
- MPFC 3-0 Chawnpui FC
MPL champion lai Mizoram Police FC chu MPL 11 round 3-ah an chesual a, team thar SYS FC lakah 3-2 in an tlawm. Round 3 lamah an chak loh vangin insiamthat an mamawh a, an mamawh ang ngeia insiamthain hnehna an chang leh nghal a, point thum nen hma lam an pan.
Point thum hmua panganna awm mek Mizoram Police FC hian point hnih hmua pasarihnaa awm mek Chawnpui FC an hmachhawn a, champion hlui lakah an khel tha hle. Inkhel tan atanga minute 23-naah senior player Lalbiakhlua chuan hmahruaina goal a thun. MPFC in hmahruaina goal an thun hnuin innkhel a hmuhnawm zui viau a, goal thun tumin tan an khawh nasa dun hle. Inkhel hmuhnawm takah goal a luh belh lawk thei lova, MPFC hian 1-0 a hmahruai chungin chawlhlawk an hmang.
Chawlhlawk hnu lamah MPFC an khel tha chhunzawm a, goal hnih an thun belh leh. Minute 63-naah Lallawmkima chuan an goal hnihna thunin an hmahruaina a tizau. Goal thun mamawh Chawnpui FC in goal thun tumin tan khawh thin mah se inrem fuh tak MPFC tlarhnung an thiat hleithei lo. Hun rei tak chhung goal lut a awm belh theih lawk loh hnuin hun tawp dawn hnaihah MPFC an che fuh nawn leh. Hun pangngai tawk dawn tep minute 88-naah Isak Malsawmkima chuan an goal thumna thunin an tawp a khar a, si thum faia hnehna changin point thum hlu tak an hmu. He inkhelah hian MPFC tana khel tha tak R. Malsawmtluanga chu ‘
Kuriz Man of the Match’ ah thlan a ni.
Champion lai Mizoram Police FC hian khelh li atangin point ruk an hmu a, table-ah hmasawn hretin palinaah an inhlangkai. Champion hlui Chawnpui FC hian khelh li atangin point hnih chiah an la hmu a, Table hnuai ber dawttu an luah chhunzawm ve thung.
- FC Bethlehem 1-1 SYS FC
LZ Juice MPL 11 round 4 a inkhel hmasa berah season thara team hmuhhnawm ber pawl, tlawm nei lova kal tluang mek SYS FC leh khelh thum tlawm zawn tawh FC Bethlehem te an inhmachhawn a. SYSFC in chawlhlawk hmaa goal an thun an venghim zo lova, uiawm takin hmahruaitu thar nih an tumna an puitlin zo lo.
Hmahruaitu thar ni thei dinhmuna ding SYS FC hi rin lawk ang ngeiin hmuhnawm takin an inlan zui leh a, inkhel hmuhnawm takah goal thun hmasa zawkah an tang. Chawlhlawk dawn hnaih minute 42-naah Andres Lalhmingmuana chuan hmahruaina goal a thun a, si khat faia hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm viau a, FC Bethlehemin chawlhlawk an hmang tangkai a, an si phurh sutna goal an thun. Minute 72-naah Varun Raj Tamang chuan FC Bethlehem tan goal thunin an si phurh a sut. 1-1 a nih hnuin inkhel a hmuhnawm zui viau a, goal thun tumin innawr na tawn viau mah se goal thun belh thei an awm tawh lo a, 1-1 a inhnehtawk chungin an inthathen. He inkhel hmuhnawm takah hian FC Bethlehem tana khel tha tak Kiran Chhetri chu ‘
Kuriz Man of the Match’ ah thlan a nii.
FC Bethlem lakah an chak zawh loh vangin SYS FC hian hmahruaitu Chanmari FC lehpel a hmahruaitu nih lai lawk an tumna an puitlin zo lova, khelh li atanga point riat hmuin pahnihnaah an inhlangkai. Hmahruaitu Chanmari FC leh pathumnaa awm mek Aizawl FC te an inkhel dawn a, SYS hian pahnihnaa awm zui theihna hun tha an nei a, Chanmari FC leh Aizawl FC te hi an inhnehtawk a nih chuan SYS hi pathumnaa an tlahniam zui leh dawn thung. SYS FC laka tlawm pumpelh FC Bethlehem hian season thara a vawi khat nan point an hmu a, khelh li atanga point khat hmuin table hnuai ber an luah chhunzawm tho thung.
- Vawiin inkhel tur
LZ Juice MPL 11 round 4 hi vawiin chawhnu dar 12:30-ah khelh chhunzawm a ni dawn a, team lian pahnih Chanmari FC leh Aizawl FC te an inkhel ang a. Chawhnu dar 3:30-ah Sihphir Venghlun FC leh Ramhlun Athletic FC te an inkhel zui ve leh ang.
Dar 12:30-a inkhel tur Chanmari FC leh Aizawl FC te inkhel tur hian ngaihven an hlawh a, inkhel hmuhnawm tak an lantir tura ngaih a ni. Anni team hnih hi season kal mekah tlawm nei lova kal tluang mek an ni. Chanmari FC hi vawi thum an chak zawn tawh a, point kua hmuin table chung berah an awm mek. I League team Aizawl FC hian khel thum atangin vawi hnih hnehna an chang a, draw vawi khat neiin point 7 an hmu a, pathumnaah an awm mek. Hmahruaitu Chanmari FC an hneh a nih chuan khelh li atangin point 10 an hmu ang a, table hmahruaitu thar an ni ang. Chanmari FC hian an elpui lian Aizawl FC an hneh a nih chuan MPL 11 a chak vek awmchhun an ni chhunzawm ang a, point 12 hmuin an hmahruaina an tizau leh zual thung ang.
Chawhnu dar 3:30-a inkhel tur Sihphir Venghlun FC leh Ramhlun Athletic FC te hi chak mamawh an ni a, chak tumin an innawr hle ang. Anni team hnih hian khelh thum atangin point thum an hmu ve ve a, an inkhela chak zawk zawk hian point ruk an hmu ang a, table-ah hma an sawn ang.