Olympic khel tura inbuatsaih mek USA Basketball team chuan inbuatsaihna tha takin an hmang mek a, inkel vawi li an hmachhawn tawhah hnehna an la chang vek. LeBron James leh a hote hian London-a an khingpui Germany chu 92-88 in an hneh.
Olympic khel tura inbuatsaih USA leh Germany te hian London-ah inkhel hmuhnawm an lantir a, an inhnehtawk hle. Quarter khatnaah point 10 in USA an chungnung a, tha zetin bul an tan. Quarer hnihnaah Germany an khel tha zui ve thung a, point thuma chungnungin an inkar an tizim. An inkar zim hret mah se point 7 a hnufual zawk ni chungin chawlhlawk an hmang.
Chawlhlawk hnu lamah Germany in bul an tan tha ve thung a, point 10 ngawtin an chungnung a, point thuma hmahruai chungin quarter hnuhnung ber an hmachhawn. Quarter hnuhnung berah USA an khel tha a, a bikin LeBron James a khel tha hle. James khelh that zarah USA hi point 7 in an chungnung a, point liin hnehna an chang zui ta a ni.
Germany an hneh tum hian LeBron James chuan point 20 a thawkchhuak a, USA tana point thawkchhuak hnem ber a ni. USA tan hian player langsar Stephen Curry chuan point 13 a thawkchhuak a, Joel Embiid chuan point 15 a thawkchhuak ve bawk. Anni pahnih bakah hian NBA-a player langsar tak Jayson Tatum chuan point li a thawkchhuak ve bawk. USA lakah Germany tana point thawkchhuak hnem ber Daniel Theis chuan point 18 a thawkchhuak.
Olympic-ah champion tura rinkai tak USA hian July ni 28-ah an match hmasa ber an khel ang a, Serbia an hmachhawn ang. Serbia an hmachhawn hnu hian South Sudan leh Puerto Rico an hmachhawn zui leh dawn a ni.