- Ruata
Royal Enfield chuan tunhnaia an bike hralh kal ber te zinga mi Classic 350 chu hmel thar leh thil thar nen an rawn thawm belh dawn a, he bike thar tur hi thla tharah hian an tihchhuah hmel a ni.
Tuna chhuak mek, Royal Enfield Classic 350 generation thar ber model hi nikum August thla atang khan tihchhuah tan a ni a. A kum 1 naah hian midlife refresh ti a an sawi, han tuai thar leh zeuh an tum chauh a ni a. Model thar danglam hlak ang kha a ni dawn lo a ni.
Royal Enfield chuan Classic 350 thar tura kan hmuh tur hrang hrang hi an la puangzar lo a. Hetihrual hian lirthei lam chanchinbumi chak tak tak te atangin hriat theih erawh a awm nual tawh a. Classic 350 thar tur hi a landanah a rawng leh a tial dan design lamah thil thar kan hmuh hmel a. A khawl lam erawh tuna khawl thar tha tak a hman mek hi a la hmang zui zel dawn a ni.
Classic 350 thar turah hian chi hrang duhthlan tur a rawn tam dawn a. A man to lutuk lo, a hnunglama drum brake hmang te pawh a rawn chhuah tel beisei a ni. 2024 Classic 350 lo chhuak turah hian a lighting system zawng zawng LED a ni dawn a, hetah hian LED headlamp, LED taillight leh LED pilot light te a tel dawn a ni.
Tunah hian a ke lamah chuan single channel ABS leh dual channel ABS hmang, a wheel rim-ah pawh spoke leh alloy wheel hmang te duhthlan tur a awm mek a, hei pawh hi kan la hmuh chhunzawm zel hmel a. LED headlight hmang hi dual channel ABS nei, a man to hret hoah a nih hmel bawk a ni.
He bike thar turah hian danglam tlem azawng kan han tarlan bak hi chu a ngai ang deuh vek a ni dawn a. RE Classic 350 thar tur hian tarlan tawh angin a khawl ngai, 350cc, single-cylinder engine, fai tha leh NVH level hniam tak a hmang dawn a. He khawl hian power lamah chuan 20.2 bhp a pechhuak thei a, 27 Nm torque a pechhuak thei bawk a. Classic 350 hian semi-digital instrument cluster a hmang a ni.
2024 Royal Enfield Classic 350 thla thar, August thla kar hnihna velah kan hmuh theih hmel a. A hma aiin Rs 5,000 velin a to belh hret hmel a bawk a. Tunah hian Rs Nuai 1.93 – 2.25 (ex-showroom) man bawr a ni mek a ni.
Royal Enfield Classic 350 hi tunhnaia Royal Enfield bike ho zinga hralh tam ber pawl a ni a. A hralhchhuah zat pawh hian kiam lam a la pan lem lo a, a vanglai a intan dawn chauh te pawh a tih theih a. Lirthei leitute tana hlimawm leh itawm tura hetianga model update an rawn nei tur pawh hi market lama he bike model ti vul zual zel tu a nih ngei pawh a rinawm a ni.