Nimin khan Lalthansanga, Minister, Sericulture Department etc. leh Aizawl East I bialtu MLA ni bawk chuan a bial chhung Zemabawk North huam chhung hmun hrang hranga chhiatna thlengte a hmunah a tlawh.
Lalthansanga chuan, “Tun tum chhiat tawhna hi a namailo hle a, kan bial chhungah pawh nunna chan hial te kan awm hi a pawi ka ti hle a ni. Sawrkar pawh hian chhiat tawk chhungkuate leh khawtlang tan theihtawp a chhuah tak meuh a, sawrkar leh a department ang pawhin vawi tam tak kan thukhawm tawh a ni,” a ti a. “A theih anga chakin chhawmdawlna pawh kan inpe chhuak reng a, duhthusam ang diak diak erawh chuan hma a lak theih loh avangin mipuite hriatthiamna kan dil a ni,” a ti bawk.
Sericulture Minister chuan, “Hmun hrang hranga chhiat tawhna avangin hmasawnna hnathawh lo chawlh ringawt a rem lo va, department hrang hrang ten mahni hna chanpual theuhah ram tan theihtawp an chhuah reng a ni. Ka department chante pawh an awm mai mai bik lo va, Sangha thianghlim ei tur hnianghnar taka kan neih theih nan Fisheries department ten hma an la mek a, Sericulture hi ram sum leh pai dinhmun chawikang dawrh thei tur leh eizawnna ngel nghet din theihna a ni bawk a, chutiang bawkin department dangte pawhin anmahni line theuhah thahnemngai takin hna an thawk a ni,” a ti a. “Ram tan hian theihtawp kan chhuah zel dawn a, mipui lam pawhin sawrkar tha kan tih chak a ngai a, ram inrelbawlna hi Sawrkar kuta dah mai lovin kan zavaia tanruala kan thawh ho a ngai a ni,” a ti bawk a ni.
Lalthansanga hian Zemabawk North-a Sericulture department hmun hmate a tlawh nghal a, ZPM Aizawl East I Block hruaitu leh Unit hruaitu thenkhat bakah Zemabawk North Local Council member leh Sericulture Department hotuten an tawiawm a ni.