- K. Hmingthankaia
Politic sawihona? nge, inhnial patawkna group thenkhatah hian MNF unaute huat zawng hi ka sawi uang lui zing ta riau maia, vawiin chu an tana thu tha, thuruk ualau, mi hriat hnu leh sawih hnu, mahse, sawi nawn fo ngai leh, zawm theih chuan party tana tha em em si hmang hian kan tlawn teh ang. Mahse, hetiang thu hi tun bak ka sawi lo ang, chu pawh a tawi thei ang berin sawi ila. Heng thu tha ka present avang hian ZPM leh party dangte khan min lo haw lo ula, tu party tan pawha tha a nih hi. Mahse, tunah chuan mnf focus bik ang.
Democracy ramah chuan roreltu party a inthlak thin. Inthlak zin chang leh inthlak har chang a awm thin. Tuten nge thlak thin. Mipui tam zawk vote hmanga thlak an ni thin. India ram leh State dangte chanchin chu sawi lovin, kan Mizoram, mi ram nena tehkhin theih loh, mi special Mizote ram chauh tunah kan sawi ang.
Mi rama thleng thin, Hnam leh Sakhua avanga issue lian lutuk vang emaw, hnam tenau leh mirethei, mi hnuaihnungte chunga tawrhna nasa lutuk leh nekchepna nasa lutuk vangte, Danin awmzia a neih lova, mob rule leh violence rapthlak tak tak thleng nasa lutuk vangte, nawrhna lian tak tak leh hel ho chet nat lutuk avangtea sawrkar thlak ngai ang hi Mizoramah chuan a awm ve ngai lo. Mizo specialte kan vannei hle.
Mizorama sawrkar kan tehna thenkhatte chu a tawi zawngin sawi ila:
- An hna thawh leh thil tih reng reng, project lian tak tak leh tenau deuhte nen vek, ram hmasawnna duh tak takna avanga tih a ni em? tih leh, eng hna leh thil tih pawh nise, chu thila mawhphurtu chuan, chu thil chu a hlawhtlin ngei theih nan, mipui nawlpui leh hnaihnung zawkte pawhin an hmuh theih leh an hriatthiam theih turin, a bul atanga a tawp thlengin a inpe em tihte, Project leh eng hnathawh pawh, a phena mimal hlawkna tur leh mahni hmasialna awm ngei nia hriat theihte, Corruption pratice na tur liau liau a ni tih hriatruk thup theihte leh, hna tenau deuh, party workerte thawh thinte chu, ram, khua leh veng leh, mahni Mizopuite tana hmasawnna tur leh thil tha duh tak takna avanga, atha thei ang bera thawh a ni em? A pawisa ringawt mitthla run lovin, thahnemngaihna tak tak leh tih tak zeta thawh a ni em, tihte chu sawrkar lai party kan tehna pakhat a ni.
- A chunga kimlo taka kan sawi khi chu politic sawrkar kan bukna tur figure lianpui, lang chiangsa reng a ni. A dawt leha pawimawh em em, hote anga lang si chu hei hi a ni. Party hruaitu, Minister leh MLA zawng zawng leh, party mi leh sa, worker, ate ber thlenga kan khawsa zia, kan nunphung, kan hawiher, kan awm dan leh tawngkam hi a ni.
Party-tin mi leh sate hi, a te ber atanga a lian ber thlengin, kan special Mizo hnam rilru fet tak atang leh, kan Kristianna rilru thikthu chhe tak mit atang hian kan inteh ru veka. Chutiang thil zahthiam leh vawnghim zawnga awm tum hram hram leh, chutiang lam pawisa lova, a palthlu zawng leh kalpel zawnga khawsate chu kan thinlung phekah hian lang lovin, ngawi rengin a inziak zel thin a ni.
- Pawimawh leh em em mai chu, party mi leh sa, worker te khawsa zia leh tawngkam hi a ni. Langsar taka party mi leh sa an ni tih hriatte khawsa zia leh nunah chuan, tlawmna leh tlawmngaihnate, mahni mihringpuite ngaihpawimawhna leh zahderna an neih leh neilohte hian mipui hipna leh hlohna a hril thui em em a ni.
Mi zawng zawng hi kan chhungril rilru dik tak leh kan nihna dik tak chu, kan hmel, kan thil tih, kan awm dan leh khawsa zia leh kan tawngkamah hian a langchhuak veka. Tih tak takna leh rilru hrisel leh dik atanga lo chhuak a ni em, thinlung dik atanga tih a ni em? tihte hi miten min lo chhiarthiam vek thin a ni. Chu chu Pathianin ropui taka min siam dan a ni reng a ni.
Awle, khing kimlo taka kan sawi tak zawng zawng atang khian mipuite hian nitinin, zawi zawiin mark min pe renga, a tawpah thutlukna nghet tak, pass tur leh fail tur decision chu fel takin an siam ta thin a. Result chu Inthlan hunah an puang ta thin a ni. Pathian siam mihring puitling tawhte hian vawikhat thu-tlukna duhthlan kan neih tawh leh, kan duh zawng kan thlana kan vote tawh hi, chuti maia sawhsawn leh hi harsa tak a ni tawh. Kan chungah thil tha lo lianpui an ti a ni ngawt loh chuan.
Nimahsela, engvang pawhin sawrkar chu a inthlak leh ang. Kum khuaa sawrkar tur an awm lo. Thil sual lianpui an tih kher loh pawhin, inthlang ramah chuan sawrkar kan thlak leh mai thin. Tuna ZPM sawrkar pawh hi thlak hun a la awm ang. Pawi lian tak an ti a nih kher loh pawhin, a ngai nin vang hrim hrim pawhin engtikah emaw chuan thlak hun a la awm ang.Mahse, tun dinhmunah chuan, thil pawi lian tak tiin, mipui leh Pathian pawi an sawi a nih ngawt loh chuan, an ni thlak zo tur leh, han tlanchhiatna tur dang party ngaihzawnawm leh beisei tur an awm hrih lo chu a nih hi. Pathian remruat mak tak leh, eng wave emaw tak a awm a nih ngawt loh chuan. Wave kan tih pawh hi, a hmaa kan sawi zawng zawng inkhawlkhawm puakkeh tho kha a ni a. Chuvangin, Serafim ang diak diaka awm lova, palthluk leh palbuak, tih fuhloh te chu nei ve bawk mah se, mipuite hian a hmaa kan ngaihzawn rawn ang em em kha chuan ngaizawng tawh chiah lo pawh ni ila, chuti mai chuan kan ban thei tawh kher lovang.Anni tho hi kan vote tlin leh a rinawm- tuna a lan danah hi chuan.
Thurawn for MNF: Mipui tam zawk vote hmuha, sawrkarna chan leh in duha in tum a nih chuan tan in lak hle a ngai. Opposition chhel tak leh tlawm tak, fing tak si in nih a ngai phawt. Sawrkar lai thlakna tlak khawpa itawm nih tum rawh u. Tih tur leh tihloh tur, zir tur leh insum tur tam tak in nei ang. Tuna in khawsak dan hi chu back gear kuai in ang tlat. Thil tak tak, issue lian leh pawimawh lutuk, hnam nghawr dawt thilte a nih lemloh chuan, thawm neih duh vang hrim hrima thawka phitiah Press release leh Press conference ti lutuk suh u. Mipuiah a tla na lova, a hne-awm mai mai mai thei. Tunlai-ah thu ho mai mai leh lem lutukah mipui rilru hruaipen a theih tawh loh. Press confetence vel in nei dawn a nih pawhin, mipui mar dek thiam ula, mipui hmachhawn turin mipui rin zawng leh ei zawng deuh
mihring inruat thin rawh u.
Party workerte an pawimawh lutuk. Sawrkar thiltih leh sawrkar thu leh hla ril hre pha lo mipui nawlpui leh, mi naran leh mawl deuh zawk, mahse, vote nei si ten sawrkar lai leh sawrkar tum party hlimthla an hmuhna chu vengchhunga party worker te an ni. Party tana rinawm em em leh partya ruh tak, party ruihchilh tute hi party tan an hlut em em laiin, party tan,’a trihkhai,’ mipui hnartu, party teite-a tichhetu an ni thei, an ni thin tawh. Tu party-ah pawh chutiang chu a awm thei.
MNF Worker te zir tur leh insum tur in nei nasa. Ruling in nih laiin awm dan in thiam lova, Opposition in nih hnu-ah in thiam lo lehzual. Social mediaa inlan turte hi a hranpa inruat rawh u. In inruat tawh a nih phei chuan zir tur in la ngah lutuk. Eng anga lehkha thiam sang leh hausa, in leh lo nei tha eng ang mah se, politic-ah chuan, eng level-ah pawh a hmatawng tur hi chu mi bik nih a ngai tih hi hriat tur. Social media leh vantlang hmaah hi chuan, hre tlem, chhiar tlem, dai zau lo, experience nei zim lutuk leh environment hniam lutuk ho leh tawng duh lutuk ho hi chu, phur hle mah se, inlar tam lo mai rawh se. Tuna in awm dan ang hi chuan in te tial tial anga, Congress-in an lehpel tial tial ang che u. Congress khawsa zia te hi zir rawh u. In hotute zingah hian insurvive dan hria leh thiam tam tak an awm, mahse, nangmahni hian in pawt back tlat zel thei tih hriat a tha.
He politic game competition zau tak leh sang takah hian sa rak mai mai leh sa tal mai mai chi a ni lo. In zingah politic strategy thiam an awm ve teuh, chung ho zai ngaih nachang chu hre rawh u. Tuna in awm dan hi chu, a engahmah hma hian in thinur em em reng ringawta, tawt em emin in sa up up reng ringawt niin a hriat. Opposition in nih hi pawm ula, opposition nih zir rawh u. Chhel tak leh tlawm tak, fing taka ngaihtuah tlat siin, fim takin awm ula, tichuan, in hahdam anga, tih tur tha leh tih dan tha in hre thei zawk ang.
Sawrkar term khat chhung hi ruling tan chuan reilote ang a ni a, opposition tan chuan rei deuh asin. Opposition nih thiam tlat loha, hreawm tih ngawih ngawih chuan ruling party apiangah inpek mai tur. Chu chu politic huangchhung dan a ni. Political philosophy-ah pawh- ‘Politic-ah chuan hmelma hlun an awm lova, thian hlun pawh an awm lo’ an lo tih daih tawh kha.
Khing thute khi in pawm duha, in zawm duh chuan, ral lovin in lian leh tial tial anga, inla dingchhuak leh mai ang.
Amaherawhchu, sawrkarna chan leh a, Mizoram budget enjoy leh te in tum hran tawh lo a nih chuan, tuna in awm ang, It is your life kha free takin i enjoy zel thei e.
Best wish for future.