Thenawm state Assam khawpui Guwahati-a 2nd Hockey India Sub Junior Men & Women East Zone Championship 2024 khelh mekah nimin khan women’s category-ah Hockey Mizoram chuan si 17 fai tehrengin mualneitu Assam Hockey an sawp a; he inkhela goal nga khungtu Durtlang naupang K. Vanlalpeki (Apektei) d/o K. Vanrammawia chu ‘player of the match’ atan thlan a ni.
Durtlang Mualveng player Apektei hi Thenzawla Mizoram sawrkar enkawl hockey academy-a zirlai niin, Mizoram team-ah hian a naupang pawl ni mah se Maulana Md. Tayabullah Hockey Stadium inkhelah hian Assam lakah a tawrhhlelhawm hle a, minute 17, 27, 32, 34 leh 59-ah goal a khung.
Mizoram tan hian Lalnunfeli (3′, 48′), C. Lalruatsiami (11′, 52′), Vanlalrinhlui (15′, 18′, 29′), Laldinpuii (16′, 40′, 57′) leh Manglawmsang (30′, 49′)-te’n goal an khung ve bawk.
July ni 24-31, 2024 chhunga khelh zawh tura ruahman he tournament women’s category-a Hockey Mizoram tum leh tur Hockey Jharkhand chu team tha bera ngaih leh champion tura rinkai niin, naktuk, Pathianni zing dar 7 hian Mizoramin an hmachhawn dawn a, Mizo tleirawlte tan fiahna lian a ni ang.
Hockey Jharkhand hian nimin inkhel dangah 2-1-in team tha ve bawk Manipur Hockey an hneh ve tawh a ni.