YMA General Conference 2025 thlirlawkna chu nimin, Zirtawpni khan Lalchhandama Ralte, Tuivawl bialtu MLA hoin Sakawrdai Community Hall-ah neih a ni.
He hunah hian Sakawrdai khuain kum 2025, October thlaa YMA inkhawmpui lian a thlen turah kawng hrang hranga inbuatsaihna kalpui dan tur sawiho a ni a. He hunah hian Sakawrdai khawchhung a kohhran, political party leh tlawmngai pawl hrang hrang aiawhte bakah Sakawrdai khaw thenawm Thingsat leh Vaitin atangin khawtlang hruaitute an tel.
He huna thusawitu Lalchhandama Ralte, Tuivawl bialtu MLA chuan, “Ka bial chhung Sakawrdai khuain YMA General Conference-2025 a thleng tur hi lawmawm ka ti a. He hunah hian chhungkaw tin in palai a tam thei ang ber kan thlen theihna turin inbuatsaihna tun atanga kan kalpui a ngai a, YMA inkhawmpui neih tawh zawng zawnga palaite hriatreng tlak Sakawrdai khawpuiin kan siam theih nan khawtlang mipui zawng zawngte kan tanrual a ngai a ni,” a ti. Chhantea chuan bialtu MLA a nih ang pawhin theihtawp a chhuah dawn thu sawiin, sawrkar lamah tul leh buaipui ngai a awm a nih pawhin theihtawp a ke a pen dawn thu a sawi bawk.
Kum 2025, October thla a Sakawrdaiin YMA General Conference a thlen tur atan hian Organising Committee member mi 35 inruatin hmalakna kal chhohpui mek an ni a, Sub-Committee hi pasarih (7) din ni tawhin Organising Committee thutkhawm vawi 4 neih tawh a ni bawk.