Inrinni zing khan Aizawl North II bialtu MLA Dr. Vanlalthlana, Education Minister ni bawk chuan a bial chhung mipuite dawr theih turin Laipuitlang Local Council house-ah a tum thum nan hun a hmanga, mipuite leh khawtlang hruaituten tul leh mamawh an thlen.
Bialtu MLA Mathlana’n hetianga bial mipuite tana amah dawr theihna hun a siam thin hi Aizawl North -II bial mipuite leh khawtlang hruaitute chuan lawmawm an ti hle a, mamawhtu mi thahnem tak leh khawtlang hruaiten khawtlang tana tul leh pawimawhte an thlen a, Mathlana chuan heng an mamawh leh harsatna thlente hi a theih ang ang a bawhzui sak a tum thu a hrilh a ni.
Minister hian a bial mipui te tana hun a hman zawhah Ramhlun South leh Laipuitlang branch YMA te hnen ah Library ami tur zirlaite mamawh lehkhabu, an zirna kawnga tangkai tur leh tha tak tak a hlan nghal a, Laipuitlang khawtlangin tun hnaia harsatna an tawh te a hmunah a en zui nghal bawk.
Dr. Mathlana chuan, duhsak taka amah thangtlingtu bial mipuite nena bial chhung hmasawnna tur leh mipuite mamawh sawihona hun an hmang thin chu lawmawm a tih thu a sawia, chhunzawm zel a tum thu a sawi bawk a ni.
Bialtu MLA hi ZPM Aizawl North II block hruaitute leh Laipuitlang unit hruaituten an tawiawm.