Home minister K Sapdanga’n Mizoram Police te fitness-ah hma an sawn theih nan August ni 5 ah Mizoram pumah Police te chu a rualin an parade dawn tih a sawi.
Thuthar thehdarhtu thenkhatin nimina an kawmnaah Home minister chuan Mizoram Police te’n fitness ah hma an sawn theih nan ruahman hrang hrang an siam a, a bul tan nan August n i 5 ah ram pumah a rualin minute 45 chhung physical training parade an nei dawn tih a sawi a, Police te hi rawm pawn a awm te an awm a, post hrang hranga awm te pawh, an awmna hmunah theuh an parade dawn a, aizawlah chuan a huhoa parade na hmun tur an siam thu a sawi.
Hei bakah hian Mizoram Police Sports chu Favangah an buatsaih leh dawn a, hetah hian Police te an tel vek theihna turin ruahmanna an siam tur thu a sawi a. Police te fitness lamah hmasawnna neih nasat an tum a, bul an tan anga, an ti khauh telh telh dawn tih a sawi.
Ramri buai chungchanga Assam leh Mizoram sorkar palaite an in biak tur chungchang pawh sawiin, Home minister chuan, kumin kum tira state pahnih Chief minister te’n ramri chungchanga in dawr tura thu an lo thlun tawh bawhzuiin kar kalta khan Assam sorkar in an rawn bia a, chief minister in rem a tih pui hnuah inbiak hun atana rawtna an siam chu pawmin August ni 9-ah Aizawlah an in in be dawn tih a sawi.
Mizoram sorkar palai te hi a ho dawn tih Home minister chuan a sawi a, amah bakah Home department hotute pawh an tel dawn tih a sawi a; Assam sorkar palaite hi an Border Protection and Development Minister Atul Bora-a’n a rawn ho ang, Official engemawzat an rawn kal dawn tih a sawi.
Sapa chuan ramri buai chingfel tura in biakna hi lo awm tawh thin mahse tuna in biakna erawh ZPM kaihhruai sorkar hnua a vawikhatna a nih ve thung thu leh he inbiakna hian rah tha a chhuah anga, hmasawnna a awm ngei an beisei tih a sawi.
An in biaknaah hian memorandum ken te pawh an nei dawn a, ramri ah in thawn thutna ang chi kha awm tawh lo se an duh thute pawh an hrilh dawn tihte, ministry dang hnuaia inbiakna neih leh tur ni mahse thu hlui, lo kal tawh sa te chu an paih ngawt a rin loh thu a sawi.
Home minister chuan, ramri buai chungchangah hian mipui ten harsatna an tawh hauh lohna turin tharum zawng ni loin dawhkanah chin fel hram tumin theih tawp an chhuah chhunzawm zel dawn tih a sawi bawk a ni.