Kolasib Fast Track Court naupang kum 6 mi pawngsual tu K.Rothangliana (57) mi chu kum 20 chhung lung in tang turin a hrem a, Heroin kawltu nu pahnih pawh kum 10 chhung ve ve tang turin a hrem bawk.
Kolasib Fast Track Court Judge R.Vanlalena chuan vawiin khan court thuremna hi a ti chhuak a, kum 2022 May ni 23 tlaia hmeichhe naupang kum 6 mi pawngsualtu K. Rothangliana , Bairabi Helipad Veng chu kum 20 chhung hrehawm taka jail tang tur leh cheng sang 7 chawi turin a hrem.
Bairabi Police te’n thubuai an chhui chianna a lan dan he hmeichhe naupang leh a thiante’n theihai rah tla an chhar lai chu pawngsualtu hian hruai hrangin hmeichhiat mipatna lam hawiin a khawih a, hetia a khawsa lai hi mipa naupang ten an hmuh avangin a in saseng a, FIR thehlutin man nghal a ni.
Doctor report-ah pawh hmeichhe naupang kum 6 mi chu khawih pawi hman tih finfiah a ni a, thuhretu hrang hrangte thu ngaihthlak hnuah Court chu thutlukna siamin kum 6 mi pawngsualtu pachang kum 57 mi chu kum 20 chhung lunginah khung turin a hrem ta a ni.
Kolasib Fast Track Court Judge R.Vanlalena chuan nimin vek khan heroin kawl chungchang thubuai ah thuremna ti chhuak bawkin, Excise & Narcotics Department in December ni 1,2022-a an chenna ina Heroin hawng 50 an man sak Lily Zothanpari,Tumpui Veng, Kolasib leh a thurualpui Lalparmawii, kum 38 Sawleng khua nia insawi te chu thiam loh chantirin hrehawm taka kum 10 chhung jail tang veve tur leh pawisa cheng sing 1 ve ve chawi turin a hrem.
An ruala man ve tho Zonunsangi erawh chu thla leh ni 15 maia nau hring tur anih avangin a laka thubuai bik hi chu rel leh turin a awm hrih dawn a ni.