- Zoliansanga Tlau
Mizoram-a award ngaihhlut ber pâwla chhâl ngam ‘Lelte Award 2020’ an sem tum khan tunlaia Mizorama hla phuah thiam leh zai thiam, mipuite’n an ngaihhlut leh huhang ngah ber pâwl ni-a lang K. Hminga chuan lawmman pahnih – Song Writer of The year leh Male Singer of The year (Lengzem) ngawt a dawng kha a phu hle.
K. Hminga hla YouTube-a ka hmuh theihte chu (Hawrawp indawtin) :
Awmlo Ta La
Aw Lungrun
Duhaisam
Hmangaih Hmasa Ber
He Lunglen Ruam Ata Hi
Ka Hringnun Diary
Kawtthler Khawhar
Lehkhathawn Hnuhnung
Rilru Indona
Si-âr Lalnu
SDO Dance
Tu Nge Inthlei Thei
Tawnmang Lova Lasi
Thurochhiah
Zan Zai Ri
Zalenna tihte hi an ni hlawm.
K. Hminga hla ho zingah hian ‘Tu nge inthlei thei’ tih hla hi ka dah sang ngang mai a. Zirlaibu hiala telh tlak niin ka hria. A phuahtu ngei pawhin a perform-na hmun pakhatah hnukulh ?euhva a sakpui hial nghe nghe kha.
Tu Nge Inthlei Thei
Ram leh kohhran a hruaitu mi rawnkai te,
Zahawmna dawhsan a ding a felna hmaikawr vuah a;
Biakbuk thianghlimah leh pisa ropui a afawng vuantu chanchang,
Thiltitheitu nih vang a diklohna thup ching te,
Rawngbawlna sang chelh vang a dik ber a inngai,
Thihna hmaah angkhat a kun za theuh tur hi,
Tu nge inthlei thei?
Zirna rûn sang hrut chhuak a thiamna lehkha mawi tara,
Finna aia chapo na zirchhuak hretam ber a inchhal;
Inthiamna hriam khan mi a hliam,
In vanneih a siamin rawnkai in chang leh si,
Dinhmun thatna atanga mi hmuhsit ching te,
Thiamna sang tak atanga mi chungtlak ching,
Thihna hmaah angkhat a kun za theuh tur hi,
Tu nge inthlei thei?
Daikil kawm kara seilian pa mawlmang leh hriat tlem,
Aw, changkanna thlifim pawh dawng lova an ngaih saw;
Lei ropuina lamah leh hausakna tehfung a,
Rethei, pachhia chanchang saw,
Aw, siamtun duhten a duan hringmi a nihna saw,
Lei ropuina thuam thuahriat aiin a hlu,
Hausakna leh ropuina te pawh hi a tehtu a zir a ni.
Nang mihring, i mihring mihrinna kha thlir la,
Ngaihtha tak a famsan tlak damchhan i nei em?
Thihna hmaah angkhat a kun za theuh tur hi,
Tu nge inthlei thei?
K. Hminga hian kan inenfiah ?heuh theihna turin kan hma zawnah dárthlalang a rawn hung a. Insiam?hat nana hmangin kan huaisen ngam dawn em le. He hla hi ngun taka ka ngaihtuah chiang poh leh Mizo kristian-te nihna dik tak tarlang thei hla ?ha tak a nih hi ka ti a. Ka han ngaihtuah chiang leh deuh va, khawvel nihna pawh a nih hi tiin ka mittui a hnâm ?helh a ni.
Chhungril mawina aia pawnlang mawina kan dahsan zawkna khawvel, dikna aia hausa kan ngaihsanna khawvel, mi thiam inngaitlawm aia mi fing chapo tuallenna khawvel-ah hian hetiang hla ?ha a chhuak khat viau pawh hi a âwm viau mai.
“Aw, siamtun duhten a duan hringmi a nihna saw,
Lei ropuina thuam thuahriat aiin a hlu,
Hausakna leh ropuina te pawh hi a tehtu a zir a ni”
K. Hminga rilru leh min zirtir a tum hi a va han ropui tehlul em! Nang aia dinhmun hniam zawk ni-a lang te hi i hmusit ngai em le? Pathianin mihring zawng zawngte hi duh taka a siam leh hmangaih taka a enkawlte vek an ni asin. Pathianin duh taka a siam i mihringpuite chu i hmuhsitin i chapo khum ang nga maw. K. Hminga rilru ang hi pu vek thei ila chuan mi hausa leh rethei, lehkha thiam leh thiam lo, mi fing leh mi â, Hruaitu leh a hruai, Officer leh 4th grade, Pastor leh beram te inkar zau takte hi dawhzawmin kan inpumkhat lehzual thei ang em.
Ni e, K. Hming “Hausakna leh ropuina-te hi a tehtu a zir a ni” chiang khawp mai. Sawi zui zel a chakawm mang e. Eng pawh ni se, hring kan chan chhung hian Phd theng emaw zirin sum leh pai ngah viau mah ila, chutiangin lârin ropui viau mah ila a tawpah chuan thihna hmanga ang khat veka hrut rual kan ni dâwn e. Chutah chiah chuan, chutih hunah ngei chuan :
“Nang mihring, i mihring mihrinna kha thlir la,
Ngaihtha tak a famsan tlak damchhan i nei em?” tih zawhna hi zawhna pawimawh tak a ni ngei ang.