- Mahmuaka Chhakchhuak
Tui hi a pawimawh hle mai a, Pathianthu atang pawhin a pawimawhzia kan hre thei ang. Genesis 1;2 thu kan chhiar chuan ‘Tin, lei hi a chhia a, a ruak ngawt a ni a; tui thuk tak chung chu a thim mup a, Pathian Thlarau chuan tui chungte chu a awp reng a’ tih thu kan hmu a. Eng vanga Pathian Thlarau chuan tui chungte chu awp reng nge a nih tih lam chu chuti takin hrefiah lo mah ila he thu atang ringawt pawh hian Pathianin tui a ngaih pawimawh zia pawh kan hrethiamin a rinawm a, thil dang zawng aiin a pawimawh tih a hriat.
Pathianthu lam atang chauh nilo pawh hian tui pawimawh zia chu kan hre thei bawk ang a; India sorkar laipuiah hian tui lam kaihhnawih department pawimawh tak tak a awm a, chung zinga larsar tak pakhat chu Ministry of Jal Shakti (MJS) hi niin, he department hi kum 2019-a Ministry of Water Resources, River Development & Ganga Rejuvenation leh Ministry of Drinking Water & Sanitation-te inzawmkhawma din a ni a, tui lam kaihhnawih hna pawimawh tak tak an thawk a, Anni hian India independent vawi 75-na Azadi ka Amrit Mahatsov (AKAM) peng zingah hmanlai atanga tuihna chei that leh tlo, Water Heritage Structures 75 ram pum huapa a thlan zingah khan Lunglei Serkawn hmuna awm Saptui hi a tel ve hlauh mai a. Hei hi Developed Country ni tura hmalakna pawimawh tak a ni pah bawkin kum kalta atang tawha buaipui a ni. Tichuan, ram pum atangin rawtna hrang hrang 421 lai lutin chung zing atang chuan Saptui chu Water Heritage Structures 75 thlanchhuah zinga a tel hi a lawmawm hle mai.
Central Water Commission (CWC) awm bawkin an ni hi technical organization a ni a, tui lam hausakna tihhmasawn nan technical guidance leh support an pe thin. Tin, Central Ground Water Board (CGWB) awm bawkin anni hian leihnuai tui enkawl dan leh inrelbawlna hna an thawk a, National Water Mission (NWM) awm lehin anni hian tui humhalh leh tui bawlhhlawh tihtlemna turin hna an thawk ber a, heng bakah hian tui lam kaihhnawih hi state hrang hrangte pawhin department neiin kan thenawm state Meghalaya chuan tui lam kaihhnawih department pariat lai: State Water Resources Department, Public Health Engineering, Irrigation Department, Flood Water Exploration Department, Meghalaya Water Resource Authority, State Pollution Control Board, District Water and Sanitation Missions an neiin Andra Pradesh state, Assam state, Gujarat, Karnataka, Kerala, Madhya Pradesh, W. Bengal, UP, Telangana, Tamil Nadu, Rajasthan, Odhisa leh Maharashtra state-te pawhin tui lam kaihhawih department hi pathum theuh neiin keini, Mizoramah ngei pawh tui lam kaihhnawih department pathum; Public Health Engineering (PHE), Soil and Water Conservation (S&WC) leh Irrigation and Water Resources (I&WR)-te kan nei bawk a. Heng pathum zingah hian PHE chauh hi mipuite chuan tui lama kan hriat lar niin department dang pahnihte hnathawh hi chu kan hre lo ang reng viau a, mipui tan an tangkaina pawh chuti takin kan ngaihtuah lem lo ni awm tak a ni.
Hetiang taka sorkar lam atanga tui pawimawhna kan hria a, kan ngaihven chung hian kum tam tak kal tawh atang khan tui lama harsatna hi a kiam tak tak thei chuang lo a, kan Aizawl khawpui ngei pawhin duhkhawp tui in tur a nei thei tak tak chuang hek lo. Kan khawpui lian pahnih Aizawl leh Lunglei khawpui chawmtu ber Tlawng lui hian min chawm zo meuh tawh lo a, March 10, 2021-ah khan Tlawng lui tui chu nghahkhawl ngai khawpin a tlem thut a, kan buai hle a nih kha. April 28, 2021 zan atangin tlemtea ruahtui a rawn tlak atangin kan ziaawm leh mai chauh a, hetiang bawk hian March 26, 2022-ah pawh tui nghahkhawl ngaiin kan lo awm tawh bawk a, a zia lo hle. Aizawl khawpui chawmna tur tui hi kum 1988 daih tawhah khan Greater Aizawl Water Supply Scheme (GAWSS) Phase I hawn alo ni tawhin mihring 70,000 chawm zo tura buatsaih a ni a, Phase II pawh kum 2007-ah hawn a niin Phase I nena tangkawp tura duan a ni nghe nghe a, tunah hian Phase III tur pawh hna engemawzat chu thawh zawh tawh a niin nakin lawkah hawn theih pawh beisei a ni.
July 15, 2024 nia chhuak Vanglainiah chuan ‘Tui kaihhnawih Department-te department khata dah tum?’ tih hmangin a rawn inziak kulh maiin, Mizoram sorkar chuan tun hnaiah khan tui kaihhnawih department-te department pakhata chhun fin dan tur ngaihtuahtu tur study group a din a; zir chian ngaite zir chiang a, thla thum ral hmaa report thehlut turin a ti. Study group-ah hian GAD Secretary chu chairman a ni a, member secretary-ah GAD Deputy Secretary dah a ni. member-te chu DPAR, PHE, Irrigation & Water Resource, Land Resource, Soil & Water Conservation, Law & judicial leh Finance department atangin secretary emaw, an aiawh (deputy secretary aia hniam lo) te an ni tiin a rawn ziah chhunzawm a. Hetianga sorkar lamin ngaihtuahna a hmang hi lawmawm hle mai a, tui lam kaihhnawih department-te hmun khata dahkhawm hi kan thatpuiin kan tangkaipui zawk mai thei e.
Tui harsatna hi Aizawl leh Lunglei khawpuiah chauh niloin khawpui dangte pawh hian kan tawk zel bawk a, PHED atanga tui sem lah hian duhkhawp kan ngah hman thin loh avangin tuisemtu tlawn a ngai ziah bawk nen tui haw ni hi chuan inbuatsaih a ngai viau thin. Keini awmna hmun hi a danglam bik nge ka hre lo a, nidangah hian tui sem thin a ni tho tak nain Pathianniah pawh hian tui sem a ni fo thin a, inkhawm loa buaipui a ngai fo mai. Zep thu a cheng lo; tui lam kaihhnawih department kan neih pathum Public Health Engineering (PHE), Soil and Water Conservation (S&WC) leh Irrigation and Water Resources (I&WR)-te hian mipui mamawh an phuhru zo chiah loa hriatna hi tunhnai chauha awm a ni lo a, department hming meuha ‘Tui’ hming pu lo ber PHED chiah hi tui lama mipuiin kan hriat lar a ni tlat maite hi thil kalhmang tur a ni chiah dawn em ni? Public Health Engineering tih lah chuan tui lam aiin mipui hriselna a kawk mah zawk emaw tih tur a ni bawk a, nimahsela tui chiah an buaipuiin hriat a ni si.
Engpawh chu lo nisela, hetianga tui lam kaihhnawiha sorkarin department pathum lai a nei chunga tui lama harsatna kan nei reng si hi chu thil inhmeh lo tak a ni a, kan department pawimawh tak takte hian an hna an thawk tawk lo emaw tih mai tur a ni. Kan khawpui, a bik takin District Capital chinah hi chuan tui harsatna hi awm lo thei hram sela a duhawm a, a chhan tak pawh a mi cheng tam lam vang ai mahin damdawiina damlo enkawl mek an ngah thin vang zawk hian. Entirna atan Lunglei Civil Hospital hian tui harsatna tawk ta sela kan buai tur ziate hi ngaihtuah ngai tak a ni a. Power Supply lam chu engtiang pawhin harsatna lo awm mahsela solar leh generator hmangtein emaw eng a neih leh theih maiin a rinawm a, tui lam kherah chuan inphuhrukna tur a vang viau mai thei e.
Chhungkaw tin tan ngei pawh tui pawimawhna hi sawi tur tam tak a awm ang. Thlawhhma nei tan pawh tui lama harsatna neih chuan hrehawm tak a ni a, lirthei khalh tan a ni emaw eng kawngah pawh tui hian pawimawhna thuk tak a nei vek mai. Chutiang taka tuiin pawimawhna a neih a, tui a tangkai chung si chuan tui lama harsatna kan la nei reng mai si hi thil inhmeh lo tak a ni a, ruahtui khawl lama inzirtir thar pawh kan ngai reng maite pawh hi eng emaw chu mutan lian tak kan nei emaw tih mai tur a ni. Kan sorkar hian tui lamah ngaihtuahna thar a hmang tan tih han hriat hian a lawmawm takzet a, mipui tan harsatna awm tawh lo tura hnianghnar taka kan awm theihna turin ruahmanna siam thei sela a duhawm hle ang.
Relegan Siddhi hlawhtlinna bulpui ber chu ‘Ruahtui far khat pawh hi a luangral tur a ni lo’ tia Anna Hazare hoa ruahtui khawlna lama an hmalakna vang a ni a, chutiang bawk chu keini pawh hian kan harsatna tam tak sutkianna tur leh kan hlawhtlin theihna tur bul pawimawh tak chu a ni thei tih hi kan hriat tlan a tha hle mai.