Arsenal chuan season tharah champion tumin an squad an thuamchak zel a, Euro 2024-a defender lar thar Riccardo Calafiori an la lut fel ta.
Arsenal hian kum 22 mi Riccardo Calafiori hi kum nga daih contract an ziahpui a, a manah hian an pek belh leh theih tur nen £42m vel zet an seng dawn. Euro 2024-ah a lar thar hluai hnu khan left-back mamawh Arsenal in Calafiori hi lak tumin an ngaihven nghal vat a, Bologna nen inremna an nei thei mai lo thung. Calafiori hian Arsenal zawm a chak a, Gunners in an lak ngamna zat an tipung ve bawk nen Italian club nen hian an inrem tluangtling thei ta a ni. Arsenal player thar Calafiori hian USA-ah training neia thang mek a team tharte a zawm zui ve nghal ang.
Arsenal defender thar Calafiori hi AS Roma a inzirchhuak a ni a, Roma atang hian Genoa chu loan in a zawm. Loan a chhuah hnu hian 2022 khan FC Basel a zawm. FC Basel-ah a khelh that vangin Italian Serie A club Bologna in an la kir a, a manah €4m (£3.4m) an seng. Bologna tan hian a khel tha ta viau a, Serie A-ah vawi 30 a khel a, goal hnih a thun bakah assit vawi nga ngawt a nei. Bologna hian hun rei tak hnuah Champions League an khel phak ta hial nghe nghe.
Club tan a khelh that em vangin Euro 2024-ah Italy tan khel turin koh a ni a, Euro 2024-ah Italy tan vawi thum a khel a, a khel tha thei hle nghe nghe. Inelna lianah a chet that vangin a lar thar nghal hluai a, club lian zawk ten lak tumin an ngaihven nghal. Left back mamawh Arsenal in lak tumin an chuh chak viau a. Calafiori ngei pawh hian Arsenal zawm a lo chak ve em em bawk nen an indawr fel zui ta a ni.
EPL a khel tha tak Arsenal in an mamawh em em, season liam taa an panna langsar tak pakhat chu left-back ah a ni a, Oleksandr Zinchenko leh Poland defender Jakub Kiwior ten an inkhelh chhawk. An panna lai hnawhkhat turin defender tha zet mai Calafiori an la lut dawn a, Arsenal an khawng leh zual ngei dawn. Calafiori hi winger a ni hmasa phawt a, left-back-ah chhawr a nih tak hnuin a tha zui viau a, centre-back a ni kawp thei bawk. left-back tha tak an lak luh dawn vang hian Zinchenko leh Kiwior te zinga pakhat zawk zawk tan hian Arsenal chhuahsan a tul hmel thung.