ZPM Thalai chuan nimin khan thuchhuah siamin, MNYF hruaitute’n MZP President hlui hova tunhnaia Vairengte-a kuhva bag 2000 dahna an tlawh chu lawmawm kan ti hle, an ti a.
MZP President hlui, MNYF hruaitu ni ta hian MZP President a nih lai khan Kuhva tawlhruk chungchang hi lo vei tawh ni se, Hachhek tlangdunga kuhva chingtuten an kuhvarah hralhchhuahna kawnga harsatna an lo tawh ṭhinte kha a hmunah lo zuk tlawh ṭhin se mipui pawhin tun ṭuma an kal chhan hi kan fak viau ngei ang. MNF Ministry-ah Home Minister meuhvin Mizoram Legislative Assembly Session-ah Kuhva tawlhrukna atan GST phuahchawp an siam thu leh, kuhva tawlhruknaah MNF Ministry-in an mit an siai thu a sawite kha mipuiin an la theihnghilh lo, tiin.
MNF Ministry-a kuhva phurhrukna atana kuhva tawlhte’n khawkar kawng hmun hrang hranga motor kawng an sialte hi an duh phawt chuan kan tlawhpui thei reng a ni. Kuhva tawlhruk chungchang CBI-in an rawn chhui tur hi ZPM Ṭhalai chuan lawmawm kan ti hle a; Mahni ngumkhak hmu lova, rem leh remlo pawh thlu lova ram leh hnam leh a chhunga chêng mipuite hmangaih der thut ṭhin “Politics Ball Chhia” hi mipui ten i thliar hrang thiam zel ang u, an ti bawk.