- K. Hmingthankaia
A thenin Mizo aawb anga an tih Aemsi hmak hmak laiin kei chuan, ka abc thiamsa ve te te te hi hmanna tur dang nei hek lo i, ka ti E-em-si zelh zelh a, ka ti E-ti-si telh telh zel mai a ni. Nuam ve tlat. USA pawh kan ti Emerica thlep thlep chuang lova, YMA pawh kan ti Essociation nem hlei hlei vak chuang lova, AAP lah kan ti Em-Edmi-Party leh chuang hek lo. U.P pawh kan ti Iuttar Pradesh ing-euh kual leh vel chuang hlei nem, te ka ti vel mai mai a.
Italian football league sang ber Serie ‘A’ pawh, a thenin Mizo aaw anga an tih Serie’A’ chhan chiang taka ka hriat hma leh, an league sang ber dawttu, Serie ‘B’ khu Serie ‘AW’ an tih leh si loh chhung hi chuan ka ti Serie ‘E’ zel mai ta nge. Mi Saptawng thiam ve te. Civil Hospital Aizawl=CHA? mak awm hmuk hmuk.
Khawpui lian Municipal te la hmu ngai lo leh la khawsa ve ngai lo keini ang tan chuan, Municipal in-awp dan leh an dan leh hraite hre hek lo i. Ka hriat teuh deuh ber chu, 1984 kuma Silchara ka awm laia an Bazar lian ber Fatak Bazar a kan vak tuma, a tuka an Municipal hotu lo kal tur an nghahhlelh dan leh, an lo zah thiama, a thu an ngaihchan dan zia ka hmuh khan, e, Municipal inrelbawlna neih hi a lo tha hle-in, thu an lo nei hle a nih dawn hi, ka lo ti rilru ve ringawta.
Aizawl hi Municipal City dinhmun leh inrelbawl dan ni tura ngiata bei ngar ngartu, eng Steering Comittee emaw ni te khan hun rei tak an nawr chhungte khan ka lo nghakhlel ve em em a. Mahse, ka rilru-a mawlmang taka ka lo nghahhlelh ve chhan chu hetiang lam daih hi a ni.
- Aizawl Veng chuan hnuai deuh leh kilkhawr deuh chu thu hran nise, Aizawl Khawpui laili deuh leh, mitinin kan intawm tlangdung vela Veng thenkhat ramri chungchanga neuh neuh an neih thin vangte. Mi zawng zawngin kan intawm lai deuh ber leh hmun pawimawh lai deuh ber, Treasury Square, Vanapa Hall leh Tennis Court bawr velah pawh tunhma kha chuan Venghlui leh Tuikual Vengin, Veng inri-na leh inthenna chungchangah neuh neuh an neih reng thin kha. Mahse, tunah chuan a reh ta hrih. Tun hnai deuhah pawh Zarkawt leh Chandmari ten thawm an neih leh deuh laih kha.
- Veng inthenna leilung ramri-ah chuan thuneihna leh tih theih nei lo mah se, Veng hrang hrang inzawmkhawmna laia awm, Aizawl ti Aizawl Khawpuitu tlangdung vel leh, mi zawng zawngin kan intawm hmunah te hi chuan thuneihna neiin, administration an kengkawh turah ka ngai a ni.
Aizawlah hian Mizo zawng zawng ni mai lo, Mizoram chhunga mihring awm zawng zawngten kan mamawh leh kan intawm loh-theih-loh kawngpui tlangdung, Office, Bazar, Damdawiin leh hmun pawimawh tam tak a awm. Heng hmunte hi Veng hrang hrang insik khawm vel na laite a ni thin. Heng hmun vela mahni Veng area chin te tea lo intih thuneih tum leh power lo show vel tum sek hian nunphung a tibuaia, a ti hahthlaka, a zahthlak deuh bawkin ka hre thin. Thenkhat hi chuan mi zawng zawng tana hnawksak, sualna leh rukrukte, mi hnawksakte venna leh vauna atana an tih leh, Sawrkar tha an tihchakna atana an tih a ni ngei ang. Mahse, thenkhatte erawh hi chu chutiang lam thil vang pawh chu ni berin a hriat thin loh.
Rilru hrisel vak lo atanga lo chhuak, midangte nuna lo inrawlh tum vangte, mite nunphung leh khawsak dan, an chet lak vel naa thuneih lo tum ve duh vangte, rilu te lutuk leh thalo atanga lo chhuak, mite hma lakna leh hmasawnna itsik vang leh tih bahhlah duh vangte, midangte hlim leh zalen chu ngaihtheihloh vang hrim hrimna atanga lo chhuak ni-awma ngaihtheih hi a awm fo tawh. Khap leh phal loh, duty leh check tih vel leh, thuchhuah eng eng emaw hi a awm fo thin. Veng thenkhat phei chu an Venga eng pawl bera ami emaw hruaitu rilru hrisel lo deuh an neih fuh tum leh, an neih zin deuh phei chuan, hetiang thil hi a zualkai duh thin hle. Veteran Politician leh journalist hmasa, Pu AV Pakunga of Tuikual-in,”Pawl hma lakna anga lang sawisel hlawh deuh leh thalo deuh hi chu, han chhui han chhui ila, atawpah mi pakhat rilru tha vak lo atanga lo chhuak a ni deuh zel” a tih hi a dik khawp ang.
State khat Khawpui ber leh Municipal City ve reng ruangah chuan, zan reh hi a awm thei tak tak lo a ni. A bik takin mi zawng zawngin lohtheihloha kan inhmantawm lamlian tlangdung vela, ‘Kan Veng area chinah zana dawr hawn phalloh, eitur zawrh phalloh, Wayside food truck phalloh,’ tih vel te hi chu, a khawpui rilru lovin, a riru tet thlak deuh lo maw….
- Sawi tawh angin mi zawng zawngin kan inhmantawm leh kan pan khawm vantlang hmuna mahni Veng leilung area chin zei zei lo buaipuia, chu hmuna mite khawsazia leh thiltih reng renga thu neih lo tum leh, chutiang hmuna eizawngten sawrkara fee leh chawi tur chi hrang hrang an chawi tawh chung pawha, Veng bil ho-in duh zah zah an lo chawitir ve leh zel te hi mi tam tak tan harsatna thlentu a ni. Heng thil khawn vel kaihhnawih leh thil dang vanga Veng leh Veng innghirnghona lo awm thin hi AMC hnuaiah hian a mawi chiah lo a ni.
Khing point pathum ka siam chhunga ka thil sawite khi AMC awm hnu chuan awm tawh lo tura ka lo beiseite an ni. Tunah hian a bo ta nge, ala awm zel tho. A reh ta deuh a nih chuan, AMC thil tih vang nge, mipui kan changkang ve tawh hrim hrim.
Engpawh nise, Veng bil chhung inrelbawlna hi chu Sawrkar Dan zul zuiin Vengchhungin lo inenkawl mai se, mi zawng zawngin kan intawm Vantlang hmunte hi chu AMC kutah awm mai se, kan fel fai zawkin kan hlim tlang zawk lawng maw, tih hi keima mimal mimawl ngaihdan mai mai a ni e.
Tuna AMC awmzia ka hmuh dan ziah zawm law law a chakawm hle mai.