- Ruata
India ram chuan SUV huangah lirthei thar a hmuh belh dawn a. Hnaivai tak taka tlangzarh tur pawh a awm nual a ni.
- Nissan X-Trail
Nissan X Trail hi lirthei thar hlak a ni hran tawh lo a. Khawvel huapa chhuak lirthei tha tak mai a ni a. Tunah hian a chhuak thar India ram chuan a hmu ve dawn a. Premium SUV huanga mi niin a chhunglamah hian thutna tlar thum, mihring phur tam thei chi a ni dawn a. Rs. Nuai 1 pein a book lawk theih tawh a. Kentel changkang hrang hrang nei tur he SUV thar hian 1.5 litre petrol khawl a hmang dawn a, he khawl hian 163bhp power leh 300Nm torque a pechhuak thei a. 12V mild hybrid technology nei a ni dawn a, X-Tronic CVT automatic gearbox hmang a ni dawn. Rawng chi hrang hrang – Pearl White, Diamond Black leh Champagne Silver te a awm dawn a ni.
- Citroen Basalt
Khawvel huapa lirthei company hlun leh lar Citroen hi Mizoramah chuan la hmu vak lo mah ila India ramah chuan lirthei company thangduang tak a ni ve mek a, lirthei lama in ‘update’ chak tak kan state-ah pawh hian kan hmuh har a rinawm loh a ni. Coupe SUV huangah Basalt tihchhuah an tum a, tun thla chhung hian an tlangzarh hman beisei a ni. Tuna chhuak mek C3 Aircross platform, kentel hrang hrang leh a khawl thlengin a rawn tawm dawn a. 1.2 litre turbo petrol khawl. 110PS power leh 205Nm torque pechhuak thei a hmang dawn a ni.
- Tata Curvv EV
Kar thar maia tlangzarh tura beisei, electric khawl hmang, Coupe SUV huanga mi tho, Tata Curvv EV-ah hian battery pack pahnih – 40.5kWh leh 55kWh duhthlan tur a awm dawn a. A indawt danin vawikhat charge full in km 465 leh km 550 a thui a tlan thei dawn a ni. Curvv hi electric chauh ni lo, petrol leh diesel pangngai kan tih, Internal Combustion Engine (ICE) khawl ring pawh kumin kum tawp lama tihchhuah beisei a ni a. Tata Nexon khawl a rawn tawm beisei a ni a, he SUV thar tur hian hmanraw changkang tak tak a rawn kengtel nual dawn a ni.
- Mahindra Thar Roxx
India ramin nghakhlel taka a thlir thup, Mahindra Thar kawngka panga (5-door version) nei chu tun atanga reiloteah tlangzarh a ni tawh dawn a. Vawi duai lo a chanchin kan lo ziak tawh a. Tuna Thar chhuak mek (3-door version) aiin a lianin mihring pawh a phur tam thei dawn a, he bakah hian bungraw phurhna pawh a zau nuam viau dawn a ni. Company lam chuan mipuite chhaih lawkna video, teaser pawh an tichhuak chuai chuai tawh a, a mawiin a dak nalh hle a. A nghahhlelhawm hle a ni.