Congress party chuan nimin khan Congress Bhavan-ah friday political session neiin, he huna thusawitu Dr. Lalmalsawma Nghaka, MPCC Treasurer chuan, “Enchhin sorkar, kalphung thar sorkar kan tih hian mipuite a tibeidawng hle”, tiin a sawi. Enchhin sorkar, kalphung thar sorkar kan tih hian mipuite a tibeidawng hle a. Sorkar kalta ten an tihngam loh tur an rawn ti chho mawlh mawlh mai a ni, a ti.
Sum inrenchem austerity measures tih te leh ZPM inhmehlohzia te hi tun hnaiah mi ten an sawi nasa viau a. Hetah hian ZPM hotute sorkar a fawngchelhtute chhia leh tha hriatna an hmansual avangah ka ngai a. Minister of state rank 7 an awm a, adviser panga te, secretary rank an awm thluah a, consultant te an awm a, Board chairman duhsak zawng an indah hmiah hmiah a, heng ho zawng zawng ken telin sum a sen tur hi Cheng nuai Rs. 134145.84 a ni a. Austerity measures an tih vel leh heng an kalpui dan hi thil inhmeh lo tak a ni. Mipui te phurrit siam belhin MNF Sorkar tih ang bawkin Petrol leh Diesel a chhiah a pung thur thur, tia sawiin.
Buhfai supply tu thlan danah ringawt pawh austerity measure an lak loh zia a chiang hle a. RL Store a chhang hniam berin quintal-ah Rs 3,400.50 in a chhang a, LZ Juice quintal 3550 a chhangtu hnenah an pe ta zawk a, hei avang hian kum tin Cheng nuai 790 dawn Sawrkar in a sen belh dawn ta a ni. An chhuanlam pawh a in ang ta lo reng reng. A thenin a hma in MAMCO pawhin an hlawhchhampui avangin RL Store hian an tithei chuang lovang tihte a lo ri a. MAMCO in an tihtheihloh avang khan eng vangin nge a chhang hniam an tawrhtir ringawt? RL Store te hian vawiin thlengin ka supply thei an ti. Keimah ngei pawhin ka bia a, supply thei lo ila eng vangin nge kan chhan ang an ti a ni, a ti bawk.
Dr. Mala chuan, Chhuanlam dang pakhatah an buhfai supply a quality a chhia, grade A ni lovin grade C a ni te an ti a. Ani chuan vawiina an supply mek leh kan buhfai supply tuma kha khaikhin rawh se, kan buhfai a tha zawk a ti. Nakinah social media ah ka awih chuang lo te an ti leh dawn, min awihlo chuan a zawhchian mai theih tia sawi bawkin “Party ruihchilh nuihzat thin ZPM worker ho hi vawiina party ruihchilh nasa ber an ni” a ti.
Sum inrenchema an hlawhchhamna chhan pawh hi eng dang a ni lo, entawnloh tawp tur MNF sorkar kalta tih dan an entawn vang a ni, tia sawiin, ram pumah mipui kan rum mek a. Sawhthing chingtute’n an sawhthing a tam avanga rum an tam hle a, vawk vulhtute an rum bawk, kan kawngpuite hi a chhe lutuk. Heng kan harsatna tawh hrang hrangte hi tu sutkiang turin eng nge kan tih? Sorkar hmasa te puh lovin mahnia tih ve mai hi hruaitu tha tih tur a ni. Mipuite harsatna sukiangtu ni turin ram hruaitute hi an intihhniam a ngai a, Congress party chuan mipuite hamthatna kan thlir hram hram thin a, a chhe lai siamthat turin theihtawp kan chhuah thin a ni. Kum 2018 ah khan Congress hi sorkar chhunzawm ta ila, tuna kan sawi nasat em em Skywalk leh Ropeway te hi a hlawhtling ngei ngei ang, a ti a.
ZPM te ka challenge duh chu hei hi a ni. Congress chuan mipuite tan hna kan thawk thin. Tun anga an kal mai mai chuan engmah kan ni dawn lo. Zoram mipui chhanchhuak leh turin Congress hian theihtawp kan rawn chhuah dawn a ni, a ti bawk.