Manger hriat hlawh zinga mi David Moyes chuan Manchester United-ah a hlawhchham tih a pawm a. A hlawhchham chhanah player lak luh a duh ngawih ngawih Gareth Bale leh Cesc Fabregas te a lak theih loh vang niah a ngai thung.
Manchester United manager ropui ber Sir Alex Ferguson a chawlh dawn khan David Moyes hian Everton a enkawl. Toffees hi a chetthatpui vangin club lian zawkte pawhin an club enkawl turin an awt a. Sir Alex Ferguson ngei pawhin a hmunruak luah a, United enkawl tur atan a duh. Sir Alex-a duh ang ngeiin Moyes hi Manchester United manager a ni zui ta nghe nghe.
Team vangtlanga Everton enkawl ang ngawtin team lian Manchester United enkawl a lo awlsam lo va, Moyes-a’n hnuhma chhe tak a hnutchhiah. 2013–2014 season ah United hi EPL-ah pasarihna daih an ni a, palinaa awm Arsenal nen an inkarah point 13 lai a tla zep. Kum 1995 hnu lama a vawi khat nan UEFA champions league an khel phak lo va, English Premier League hming a put hnuah a vawi khat nan top 3 huang an luah phak lo bawk. Hemi tum hian point team lian Liverpool, Chelsea, Manchester City leh Arsenal te laka point 24 zet hmuh theihna turah point nga chauhte an hmu a, team lian te an ngam lo vek. A chetthatpui loh em vangin Moyes hi Red Devils chuan season khat bak an ruai lova an ban zui nghal.
William Hill’s podcast-ah Simon Jordan hmaa a inlan tumin David Moyes hian Manchester United a enkawl tum khan a hlawhchham tih a pawm a. ‘Hnar hnuaiah phatna bo lo’ an tih ang deuhin United-a hlawhtlinpui loh chhanah Moyes hian a duh zawng player a lak theih loh vang a nih thu a sawi a. Lak a duh ngawih ngawih Gareth Bale leh Cesc Fabregas te la thei ngat se an result a danglam dawrh tur thu a sawi.
United a enkawl chiah khan Moyes hian a duh zawng player lak tumin tan a khawh nghal a, lak tuma a dawr hmasak chu Arsenal midfielder hlui Fabregas a ni. Barcelona-a a pawimawhna hloh tan Fabregas hi lak tuma dawrin hnaih hman viau mah se Nou Camp a cham a thlang ta zawk a, Moyes-a’n a player awh em em a la thei lo phawt. 2013-ah United sawmna hnar mah se 2014-ah Fabregas hian Chelsea a zawm leh ta tho thung.
Fabregas bakah hian Gareth Bale chu Moyes-a’n United a lak luh a duh em em a ni leh. United hian wide player David Beckham leh Ryan Giggs te an lo hlawhtlinpui tawh a. Moyes hian Beckham leh Giggs te ang thoin Bale hi hlawhtlinpui theih a inring hle. Tottenham hnenah Bale lei dilna sum tam tham tak an thlen a, Bale pawh hlawh sang tak pek an huam. Bale hi lak an tum viau a, Helicopter-a phurh tumin an nghak hial nghe nghe. Mah se, United vanduaina chu Bale hi Real Madrid in lak tuma an sawm lai tak a lo ni ve kha a ni. Bale hian United hian United aiin Real Madrid a thlang zawk a, Los Blancos hian a hun laia khawvela player manto ber ni turin Bale hi an la lut zui ta a nih kha.
Player langsar Gareth Bale leh Cesc Fabregas te an lak theih tak loh vangin United hian lak tuma an awh sa em em pawh ni lo Marouane Fellaini chu bazar tawp niah an loh theih loha an lak luh a ngai zui ta a ni. United-ah a hlawhchham tih pawm David Moyes hian United a hlawhtlinpui zo lo chu pawi a tih vawng vawng thin thu a sawi a. Gareth Bale leh Cesc Fabregas la thei ngat se chuan a thusawi dan pawh a inthlak ngei a rinthu a sawi tel bawk.