- Ruata
Nissan India chuan khawvel huapa an SUV lar, mi 7 chuan theihna, X-Trail chu an tlangzarh ta a, India ramah siamsa vekin lakluh a ni a, Rs. Nuai 49.92 (ex-showroom) manin a lei theih dawn a ni.
Nissan SUV thar, khawvel huap pawha lei hlawh leh larin India ram a lo thleng hi a phurawm hle mai a. SUV lian leh changkang ngaina tan chuan thu lawmawm tak a ni awm e. India ramah pawh duhtu leh leitu an awm nual a beiseiawm a, hmanraw changkang ber bera thuam a ni a. SUV changkang huanga mi a nih avangin a man erawh a to deuh a, hetihrual hian Mizoramah pawh lirthei man to tak tak a tam ta viau mai a, tunlaia Mizoram chhung kawngpuia lirthei tlan thin te thlir chuan man to uchuaka sawi theih a ni lem lo a ni.
- A khawl
Nissan X-Trail tharah hian khawl chi khat chauh duhthlan tur a awm rih a. Hei hi 1.5 litre three cylinder turbo petrol khawl a ni a. He khawl hian 12V mild hybrid system a nei a, hei hian a tui heh zawng leh a khawl ina boruak chhia a pek tam zawng pawh nasa takin a tha zawngin a pui dawn a ni. A khawl hian 163bhp power leh 300Nm torque a pechhuak thei a, Nissan chuan an khawl hmantir hian variable compression technology a neih thu an sawi a. Hei hian a tui a tih heh loh bakah khawl a ti chak tha hle niin an sawi a ni.
- A kentel
SUV changkang leh man to ho, premium segment-a awm a nih avangin ken tel pawh tha tak tak a nei a. A ken tel zingah hian 8-inch touchscreen infotainment system with wireless Android Auto & CarPlay connectivity, 12.3-inch digital driver’s display, wireless phone charger, drive modes, keyless entry and go, cruise control, leh electronic parking brake with auto hold function te pawh a tel a ni.
Himna lamah chuan he SUV thar hian airbag pasarih (7), front parking sensor, ABS with EBD, hill start assist, traction control, limited slip differential, leh automatic wipers te a nei a ni.
- A elpui tur leh thil dang
Nissan X-Trail hian India ramah chuan Skoda Kushaq leh VW Tiguan te a el deuh ber beisei a ni a. Company lam chuan kum 3 emaw 100,0000km warranty an pe a ni.
Frank Torres, President, Nissan India Operations chuan Nissan thar an tlangzarh chu thil thar nen a nih thu sawiin, “Khawvela a vawikhat nan Nissan ho patent Variable Compression Turbo Engine a hmang a, hei hian engine khalh nuam uchuak a siam bakah lirthei khawl chevel a ti dam zual a ni,” a ti a. “India mipuiin khawvel huap SUV tha leh lar neih ve an chakna chu tihhlawhtlin a ni a, he 4th Generation X-Trail hi India ram mipuite tana kan chhawpchhuah hmasak zinga mi a ni dawn a ni,” a ti.