Zirtawp zan khan Olympic football mipa quarter-final khelh a ni a, champion tura rinkai France leh Spain in semi-final an lut. Inelna thlengtu France hian inkhel boruak sang takah Argentina hnehin semi-final a lut.
- France 1-0 Argentina
Football a ram lian pahnih, an inkarah boruak tha lo neuh neuh a awm vanga inhal thar tak France leh Argentina te inhmachhawn tur hian ngaihven a hlawh a, he inkhel hi football ngainatute an chak hlawm hle. Inkhel hmuhnawm takah France hian inkhel tan atanga minute 5-na leka Jean-Philippe Mateta tauh luh hmangin hnehna pawimawh zet an chang. France leh Argentina te an inkhelh tum hian mual chhungah boruak a sang at a, inkhel a zawh rualin buaina a chhuak zui bawk.
Inkhel ngaihven hlawh takah hian rin aiin goal a lut hma. Inkhel tan atanga minute lina lekah inelna thlengtu France hian corner an hmu. Corner atanga ball kal hi Crystal Palace player Jean-Philippe Mateta chuan tha takin a tauh goal a, hmahruaina goal a thun. An mualah hmahruai zawk an nih vangin tharum ngah zawk France hian an goal an veng nasa a, fimkhur takin ball thiam zawk Argentina an hmachhawn.
Si an phurh hnuin Argentina khel a hmuhnawm zui viau a, inkhel tawp thlengin ball chang tam zawk niin inkhel hmuhnawm an lantir. Olympic a vawihnih champion tawh Argentina hian goal thun theihna hun remchang nei bawk mah se goal-ah an chantir thei lova, uiawm takin an elpui lian France lakah an tlawm. Hun a tawp a, France an chak hnuin boruak a sang thar thut a, mualah chhungah buaina a chhuak zui nghal phat a, tunnel lamah pawh player te an intibuai zui hlak niin tarlan a ni.
Argentina hnehtu France hian semi-final Paraguay hnehtu Egypt an hmachhawn zui leh ang. Egypt leh Paraguay te hi hun pangngaiah 1-1 in an inhnehtawk a, Aigupta rawlthar ten penalty shoot-out ah 5-4 in hnehna an chang a, semi-final an lut.
- Spain vs Morocco
Quarter-final dangah Spain leh Morocco ten awlsam takin hnehna an chang a, semi-final ah intum zui turin an tlang ve bawk.
Spain hian Groupama Stadium, Lyon-ah Japan an hmachhawn a, Fermín López goal hnih leh Abel Ruiz goal khat thun hmangin an khingpui Japan hi 3-0 in an sawp. Japan sawptu Spain hian USA sawptu Morocco an hmachhawn zui leh ang.
Spain laka fiahna hautak hmachhawn tur Morocco hian Parc des Princes-ah USA an hmachhwn a, 4-0 ngawtin hnehna an chang. Morocco tan hian Soufiane Rahimi, PenIlias Akhomach, Achraf Hakimi leh Mehdi Maouhoub ten goal khat theuh an thun.
Olympic football semi-final hi zanin dar 9:30 atangin khelh tan a ni dawn a, Morroco leh Spain an inkhel hmasa ang a. Zanlai dar 12:30-ah France leh Egypt an inhmachhawn zui ve leh ang.