- Lallunghnema, Charity Lodge
Mipui kan thuhmun loh hi kan vanneihna a ni âwm e. Khawi khua a mite emaw chuan consumer sipel hi an lam ngai meuh lovang. Chutih laiin chumi khua a mite chuan chem kawm leh tuthlawh an hre bel hle ang a, thlawhhmâ a, an thlai thar turte thlirin an hman hlel ang. An hmui leh buh vui pawh a inhmeh hle ta ve ang. Keini erawh chuan buh vui te, hreipuite hi kan hmu ngai ta meuh lova; kan lung pawh an ti lêng hran lo ve bawk.
Keini a hming mai a, Consumer Activist- te thlâk hlelh ber chu a tam thei ang bera consumer-te tan a thawh hi a ni tawp mai. He hna kher hi chu huaisen ngai a ni a, khawng taka consumer-te dikna leh chanvo tlangaupui a ni bur mai.Mi biak thiam mi nih pawh a tul thin. He hna hi chuan tlan chhiatsan a ngeih lova, hnung tawlhsan a rem hek lo. Mipui tana inhlan tawp a ni a. Corruption hawrawp hi kan sipel ngai meuh lo. Hlemhlêna leh eirûkna do nan consumer-te zalenna hi a pawimawh tak zet tih hre chungin kan bei thin. Kan innghahna ber chu The Consumer Protection Act 2019 hi a ni.He Act- ah hian consumer-te humhinmna tam tak a awm a ni.
Tin, heti hi a ni a, kum 20 zet zawt Manipur leh Mizoramin Electricity Regulatory Commission an intawm hnuin July ni 16. 2024 atang khan The Electricity Act 2003 in a phût angin a hran ve vein heng state pahnih Manipur leh Mizoram chuan Electricity Regulatory Commission chu hran ve vein an lo nei tan ta a. Mizoram Electricity Regulatory Commission a lo piang ta a ni. He nî 16th July 2024 hi Mizo te tân ni chhinchhiah tlâk tak a ni a. Mizoram History-ah a chuang reng tawh dawn a ni.
Mizoram Electricity Regulatory Commission hi eng chiah nge maw a nih le? Eng hna nge maw an thawh le? Eng nge an lo awm ve hi a tulna le? An hnawk mai mai lo maw? tiin kan lo inzawt a ni thei e. Nia, Electricity Regulatory Commission hi a lo awm hmâ zawng khan Power & Electricity Department (P&E) chuan kawlphetha hi an enkawl tawp mai a.An kutah hian power thil zawng zawng a innghat tawp mai a ni.Tunah pawh hian an la enkawl lo a ni lo, P&E Deptt. hian bill, rate, tariff zawng zawng an buatsaih a. In electric chhit man an bill thin a nih chu. Thutawp neitu erawh Govt. Of Mizoram a ni a. Thuneihna pum pu hlum neitu chu Mizoram sawrkar hi a ni tihna a nih chu. Power & Electricity Department a thawktu zawng zawng, a lu ber atanga a hniam ber thlengin Govt. of Mizoram hian a thunun vek a ni.
Tichuan, The Electricity Act 2003-in a sawi angin Kawlphetha hman chungchanga thuneitu ber atan Electricity Regulatory Commission a lo pian a tul a. Chutiang tak chuan, India rama state hrang hrangte chuan anmahni pualin Electricity Regulatory Commission an nei a. Keini Mizoram leh Manipur te chuan Commission pakhat intawmin 2008 atang khan Joint Electricity Regulatory Commission for Manipur & Mizoram kan nei ta a ni.
Kan sawi mek ang hian kum 20 zet hnuah JERC chu tihtawp a niin a hranin Commission chu 16th July 2024-ah a lo piang ta a ni. Hengte hi tun huna MERC hnar kaitute chu an ni:
Chairperson : Er Benjamin L.Tlumtea.
Chief Engineer : Er H.Thanthianga
Secretary : Pu Richard Zothanpuia.Staff fel tak tak an nei bawk.Pisapui chu TBL Building,Khatla-ah an nei mêk.
He mi Nî hi chhin chhiah tur a ni a. Power & Electricity Department history-ah a lang tawh dawn a ni. Tunah chuan Power hmasawnna niin ngaihtuahsaktu thuneitu sang mi satliah lo, State sawrkar khuah khirh theih loh, State sawrkar thuneihna pawna hnathawk tur Mizoram Electricity Regulatory Commission (MERC) kan lo nei ta a ni. He thil hi thil a ni ngawt lova, Mizorama cheng te tan thil ropui a ni. State economy dinhmun a zir zela ‘tariff’ siam chhuaktu a ni.
A Nî a lo thleng a, MERC Chairperson Er. Benjamin L. Tlumtea leh a staff te min sâwm ang chuan Aijal club ka pan ve ta a. Ka theih ang tawka thain ka in thuam ve a. Nghawngawrh erawh ka awrh lova, Nehru coat an tih mai, ka neih chhun chu ka ha a, ka ‘in-confi’ ve khawp mai. He Commission (MERC din Nî) lawmnaah hian mi tam an sâwm lova, mi tlem deuh rêm râwm an sâwm a ni âwm e.
Unofficial phei chu pahnih khat bâk kan ni lovang e. CYMA President hlui lâr takPu Vanlalruata leh kei hi Activist kal awm chhun chu kan ni mai thei. Rev. Zosangliana Colney-in hun serh a hmang a, a vei zawng thu tha tak tak a sawi tek bawk. He kan Programme hi Chairperson Er. Benjamin L. Tlumtea’n hneh takin a kai hruai a, sâwmte min ti tlang nêl thiam hle. Khuallian Power Minster Pu F. Lalrodinga chuan rei lêm lo takin thu a sawi a, a sawi tha ka ti hle.
A duh apiang thusawi hunah ka ding ve a. Boruak a nuam, a hlim awm hlê. Zaithiam pakhat doctor ngatin zaiin min awi a.Dam lo enkawl a thiam tlukin zai pash a thiam a nih hi! Kan hlim a, kan lawm a ni. MERC Chief Engineer Er. H. Thanthianga’n report ngaihnawm tak a pe a, tlaiah MERC Dinner kan kil. He programme a tel ve tura min sawm hi ka lawm hle mai.
MERC hi mipuite tana thawk, mipui hnuk khawih a ni a. Commision satliah ang ngawt a en chi a ni lo. Kan Power tichangtlungtu, tihmasawntu, consumerte tana ding,consumerte econmy mil ang zel a hman man min bituk saktu a ni a. Pal zut mai mai chi a ni lo. An tan pawh hian ngaihtuahna i seng ve ang u. An pawimawh em em si a.
Eng pawh ni se,MERC hi hmel hriat tum la,i thil lei leh sum senga mi tha leh zung i hmanna a, harsatna i neih chuan Centre For Consumer Education pan ang che.