Football club hrang hrangten season thar atan inbuatsaihna ngawrh takin an nei mek a, club hrang hrang ten frieldly match an hmachhawn hlawm. Inrinni a friendly match result langsar zual kan thlir kual ang.
- Liverpool 3-0 Manchester United
Football club a ineltawk leh inhaw ber zinga mi Liverpool leh Manchester United chu Williams Brice Stadium, USA-ah an inhmachhawn a, inkhel entu mipui 77,559 zet hmaah Liverpool in United an sawp a, 3-0 in an hneh. Reds hian EPL club lian dang Arsenal pawh USA lamah hian an lo hneh tawh bawk.
Club ropui pahnihte inkhelah hian goal a lut thuai a, inkhel tan atanga minute 10-na lekah Fábio Carvalho chuan Liverpool hmahruaina goal a thun. United lakah hma taka goal an thun vangin Arne Slot team Reds in inrintawkna sang zawk an nei a, chawlhlawk hmain goal khat an thun belh leh. Chawlhlawk dawn hnaih minute 36-naah Curtis Jones chuan Red Devils lakah Reds goal hnihna a thun a, 2-0 a hmahruai chungin chawlhlawk an hmang.
Chawlhlawk hnu lamah Liverpool an khel tha chhunzawm a, goal khat an thun belh leh. Minute 61-naah Kostas Tsimikas chuan an goal thumna thunin an hmahruaina a tizau. Hun tawp thlengin goal dang a luh belh thei tawh lova, Reds hian an elpui lian Red Devils lakah 3-0 ngawtin hnehna an chang zui ta a ni.
Jurgen Klopp hmunruak luahtu Arne Slot hnuaiah Liverpool in season thar atana inbuatsaihnaah an khel tha rih hle a, vawithum an chak zawn tawh. Reds hian 1-0 a Real Betis an hneh hnuah United hneh tawhtu Arsenal chu 2-1 in an hneh zui leh a. An match thumnaa tha zual zawka khelin United an sawp zui leh ta a ni.
Liverpool in inbuatsaihna tha tak an hman lai hian United erawh in result tha neih an harsat thung. United hi Arsenal lakah an tlawm hnuin Real Betis lakah 3-2 in an char hram a, hnehna an chan hnu lawkah Liverpool lakah an mualpho zui leh. Result an neih that loh bakah hian an player pahnih; Leny Yoro leh Rasmu Hojlund ten hliam na tak an tuar a, season tharah club tan bul an tan thei dawn lo. Hei hi United boruak tirit zualtu a ni.
- City an chak ve ta
Pre-season a chak hleithei lo Manchester City chuan hnehna an chang ve ta nge nge a, Inrinnia an khingpui Chelsea chu 4-2 in an hneh. Chelsea an hneh tum hian Erling Haaland chuan hattrick a siam.
City hian Chelsea lakah bul an tan tha viau a, minute lina lekah Haaland chuan penalty atangin hmahruaina goal a thun nghal. Hmahruaitu goal thuntu Haaland hian hmahruaiana goal a thun atanga minute khat hnu lekah an goal hnihna a thun belh zui leh nghal zat a, minute 5 an khelh tlin meuh chuan City hian si hnihin hma an hruai hman der tawh.
Minute nga chhung lekin goal hnih thun hman mah se City hian chawlhlawk hmain goal an thun belh thei lova, Chelsea in an si phurh an sut thei hek lo. Chawlhlawk hnu lamah inkhel a hmuhnawm leh zual a, second half tir lamah goal a lut zawt zawt. Minute 55-naah City tan Oscar Bobb chuan an goal thumna a thun a. Minute 56-naah Haaland chuan City goal lina thunin hattrick a siam zui leh nghal zat bawk.
Si li fai ngawta an hnufual hnuin Chelsea in tan an khawh thar a, goal hnih an thun. Raheem Sterling chuan minute 59-naah goal thunin an si phurh a sut then a. Hun tawp dawn hnaih minute 89-naah Noni Madueke chuan goal thunin an si phurh a sut then leh bawk. Goal hnih bak an thun theih loh vangin Chelsea hi City lakah 4-2 in an tlawm a, City in hnehna an chang ve ta nge nge.
EPL champion Manchester City hi pre-season ah an chetha lo a, Celtic leh AC Milan lakah an tlawm zawn. An match thumnaah chak zo lo lehin Barcelona nen an inhnehtawk leh zet a, an match linaah erawh Chelsea an hneh ve ta hram a ni.
- Barcelona 2-1 Real Madrid
USA lamah EPL club lian an inkhelh sup sup laiin La Liga club lian FC Barcelona leh Real Madrid ten MetLife Stadium-ah El-Clasico an lo khel ve bawk. Inkhel hmuhnawm takah Barcelona in an elpui lian Real Madrid chu Pau Victor goal hnih thun hmangin an hneh.
MetLife Stadium-ah El-Clasico khelh a nih tum hian team hnihna an inngam tawk leh viau a, goal pawh a lut lawk thei lo. Goal lut a awm theih loh reng hnuin Pau Victor chuan minute 42-naah hmahruaina goal a thun a, 1-0 a hmahruai chungin chawlhlawk an hmang.
Chawlhlawk hnuah inkhel a hmuhnawm leh zual a, goal hnih a luh belh. Goal hmahruai thuntu Pau Victor chuan 54-naah Barcelona goal hnihna thunin an hmahruaina a tizau. Hun rei tak hnufual zawka an tan hnuin Real Madrid tan Nico Paz chuan minute 82-naah goal thunin an si phurh a sut then. Hun tawp lamah an si phurh sut tumin tan khawh nasa zui viau mah se Real hian an si phurh an sut thei tawh lova, USA lamah Barcelona an ngam lo chhunzawm zel.
Inrinnia inkhel dangah German club lian Bayern Munich chuan EPL club lian Tottenham chu 2-1 in an hneh ve bawk.