Inrinni zan khan Olympic Tennis hmeichhe final khelh a ni a, China nula Zheng Qinwen chuan Donna Vekic a hneh a Gold Medal a la. Zheng in Gold Medal a lak hi China in Tennis-a Gold Medal a lak vawi khatna a ni.
Olympic a khel tha tak Zheng Qinwen hian champion tura rinkai ber Iga Swiatek paltlangin final a lut a, final-a a khingpui Croatian nula Donna Vekic lakah harsatna tawk lovin a chak zui leh. Zheng hian final-ah bul a tan tha viau a, set khatnaah break nei zawnin game hnih chiah a hloh a, awlsam takin set khatna a la.
Set hnihnaah World No 7 Zheng a khel tha chhunzawm a, a khingpui a break leh. Break a neih zui leh vangin set hnihnaah pawh game thum bak a hloh lova, 6-2, 6-3 a hnehna changin Gold Medal a hlawhchhuak zui ta a ni. China in Gold Medal an lak ngaih lohna leh lak an beisei san lohna Tennis-ah Gold Medal an la ta nawlh hi an tan chanhin lawmawm a ni a. Olympic Tennis-a an thlen ngai loh ram thlenpuitu Zheng hian hriat ren a hlawh tawh ang.
Inrinni zanah hmeichhe final khelh a nih hnu hian mipa lamah pathumna zawn a ni a, Italian Musetti chuan set hloh lovin Felix Auger-Aliassime a hneh a, Bronz Medal a la.
Semi-final-ah Novak Djokovic hneh lova tlawm Musetti hian USA aiawh Felix Auger-Aliassime lakah tha takin a khel. Carlos Alcaraz laka tlawm Auger-Aliassime lakah bul tan tha vut lo mah se break a neih a chhawr tangkai a, 6-4 in set khatna a la. Harsa taka set khatna a lak hnuin set hnihnaah pui zawkin a inlan a, 6-1 chak zui lehin Brone Medal a hlawhchhuak zui ta a ni.