August 5, Thawhtanni khan GIG Motors I Day Football Tournament 2024 khelh chhunzawm a ni a, inkhel pahnih awmah goal 10 zet a lut. Inkhel hmasa zawkah Aizawl FC chuan ISL club North Easter United chu 4-0 ngawtin an sawp a. Sihphir Venghlun FC pawhin FC Bethlehem lakah 6-0 ngawtin hnehna an chang ve bawk.
- Bul tan fuh lo NEUFC
GIG Motors I Day Football Tournament 2024 hmachhawn turin hmarchhaka atanga ISL team awmchhun North East United FC chu pathianni khan Aizawl an lo thleng. NEUFC hian an foreign player leh an senior player tam zawk an rawn hruai lo va, an rawlthar player te tan inelna hmachhawn theihna hun tha an siamsak. ISL team hian RG Stadium-a an khingpui I League club Aizawl FC lakah bul an tan tha lova, 4-0 ngawtin an tlawm nghal.
Aizawl FC leh NEUFC te hi chawlhlawk hmain an inhnehtawk viau a, goal thun thei an awm lo. Inkhel hmuhnawm takah goal a luh theih loh reng hnuin chawlhlawk hnu lamah goal li ngawt a lut ta thung. Second half tan atanga minute hnihna lekah season kal meka goal thun thei tak Lalbiakdika chuan AFC hmahruaina goal a thun. Goal an chhuah vangin NEUFC an talbuai a, goal an chhuah leh thuai. An khingpui buai zual lai nangchingin Zomuansanga chuan minute 50-naah Aizawl FC goal hnihna a thun a, an hmahruaina a tizau.
AFC in goal hnih an thun hnuin goal thun a chawl a, goal a luh belh thei mai lo. Khuavang kal lai ang maia goal lut a chawlh hnu hun tawp dawn hnaiah AFC an che fuh nawn leh a, goal hnih an thun belh. I League club AFC tan hian Lalchhawnkima chuan minute 77-naah an goal thumna thunin an chakna a nem nghet a. Hun pek belh minute 90+4-ah goal hmahruai thuntu Lalbiakdika chuan Aizawl FC goal lina thunin a tawp a khar. North East United FC laka goal hnih thun Lalbiakdika hi ‘Man of the match’ ah thlan a ni.
- SVFC an chak nuamsa
Aizawl FC in North East United FC an sawp hnu hian MPL club Siphir Venghlun FC chuan Bethlethlem Vengthlang FC an hmachhawn a, SVFC in 6-0 ngawtin an khingpuite an sawp a, nuamsa takin hnehna an chang.
Sihphirh Venghlun FC hi BVTFC lakah an khel tha viau a, an vannei tel bawk. An khingpuite lakah goal li lai an thun bakah own-goal pahnih an hlawkpui bawk. Inkhel tan atanga minute lina lekah BVTFC player K Lallawmzuala chuan an lamah vanduaithlak takin a ti-goal a, SVFC hmahruaina goal a thunsak.
Hma taka goal an neih vangin SVFC an phur viau a, goal an neih belh thuai. Minute 17-na lekah Vanlalruata Tlangte chuan an goal hnihna thunin an hmahruaina a tizau. Minute 17 chhung lekin goal hnih thun hman mah se SVFC hian chawlhlawk hmain goal an thun belh thei lova, 2-0 a hmahruai chungin chawlhlawk an hmang.
Chawlhlawk hnu lamah FC Bethlehem an vanduai nawn leh a, goal an chhuah leh thuai. Second half tan atanga minute thumna lekah BVTFC player Vanlalpeka Pautu chuan an lamah a ti-goal a, an khingpuite goal thumna a thunsak. 3-0 a hma an hruai hnuin SVFC tan Lalremruata chuan minute 51 leh 52-naah goal thun zawnin an hmahruaina a tizau a. Ricky Lalramnghaka chuan minute 81-naah an goal rukna thunin a tawp a khar a, BVTFC lakah 6-0 ngawtin an chak a, awlsam takin point thum an hmu.
6-0 ngawta BVTFC an sawp tum hian SVFC tana goal hnih thun Lalremruata chu ‘Man of the match’ ah thlan a ni.
- FC Bethlehem an chak
Thawhtannia inkhel hnuhnung berah MPL leh I Day an hmachhawn tawha chak harsat FC Bethlehemin Chawnpui FC an hmachhawn a, minute 61-naa Kiran Chhetri goal thun hmangin an chak. FC Bethlehem chakpuitu Kiran Chhetri hi ‘Man of the match’ ah thlan a ni.
- Chanmari FC an chak zo lo
MPL leh I Day inelna lamah tlawm nei lova kaltluang mek Chanmari FC chuan thawhtanni khan Ramhlun Athletic FC an hmachhawn a, 2-2 a inhnehtawkin, CFC an chak zo lo.
MPL hmahruaitu Chanmari FC hian bul an tan tha viau a, minute rukna lekah Lalnunzama goal thun hmangin hma an hruai. Hma taka goal an chhuah hi RAFC tan James H chuan minute 17-naah a sut a, 1-1 a inhnehtawk chungin chawlhlawk an hmang.
Chawhlawk hnu lamah an inhnehtawk zui viau a, goal khat ve ve an thun belh leh. Chanmari FC chu chefuh hmasa zawkah tang lehin, Lalrokima Sailo chuan minute 64-naah hma an hruai nawn lehna goal a thun. Hnufual zawkah tang nawn leh mah se RAFC an hnual lova, an buai hek lo. Isak Vanlalpeka chuan minute 82-naah goal thunin an si phurh a sut a, 2-2 a inhnehtawk chungin an inthathen zui ta a ni. He inkhel hmuhnawm takah hian Ramhlun Athletic FC tana khel tha tak Felix Lalruatkima chu ‘Man of the match’ ah thlan a ni.