- Mahmuaka Chhakchhuak
Kum 1890 atanga British (Kumpinu sorkar) in min awp khan pawn lama kawng hrang hranga min awp mai bakah kan thinlung lam thleng pawhin min awp hneh viau mai. Ngaihtuahna hmang thei lo lekin min awp a ni ber a, kawng engkimah dan leh dun kan neihsate chu an siam danglam a, chung hmangte chuan a pui a nawiin min hrual a nih kha. Kan zinga fing deuh leh remhre deuh tan ngei pawh inhai kuakna kawng awm thei hlawl lo turin min awp hneh a, sakhuanna thlenga kan kalphung min thlak danglam sak avangin keini tan chuan an thuawi mai loh chu tihtur a awm lo a ni ber.
Kum 1946-a Political Party din thar a lo nih ngei pawh khan kan hruaitu hmasate ngei pawh chuan thil thui thlir thei bik loin a tlachawp ang deuh maiin ngaihtuahna an nei thin a. Kumpinu sorkarin min chhuahsan theih pawh kha an ring meuh lo. Ch. Saprawnga ngeiin a lehkhabu (Ka zin kawng)-ah heti hian a sawi a; Dik tak chuan Mizo Union din tirh laite chuan British hoin India an chhuahsan ngei ang tih kan ring phak lo nasa khawp a. Chhuahsan ta se, engtinnge kan tih ang? Tih phei chu kan hisap pha lo lehzual…..India Independent a thlen theih kan ring ngai lo. Macdonald sap erawh kha chuan eng emaw chen kha chu hriat a nei ve ngei tur a ni. Hriattirna Dt. 13. 11, 1946-ah pawh ‘Kum engemaw zat hnuin British sorkarin India ram leh Mizoram hi ro a rel tawh dawn loin kan hria a,’ a ti ve chiah bawk a ni….Constituent Assembly Sub-Committee Bordoloi-a ho hma a, mi hrang hrang thusawite han en ila, sap ho an chhuah tak tak kan la rin hlawm loh zia a chiang khawp mai. Lalbiakthanga leh Bawihchhuaka te chauh lo chuan Politics lam thil awmze neia sawi phak tumah kan awm hlawm loh kha. Mahni leh mahni kan iner buai vel a, Sub-Committee hmaah kan mualpho der a, a zahthlak hle a ni. kan mawl vang a ni ber mai’ tiin.
Hetia Ch. Saprawnga sawi ang hian kan hruaitu hmasate khan ngaihtuahna thui an neih loh zia chu kan hrethiam mai ang a, nimahsela hei hi Kumpinu sorkarin hneh taka min awp vang a ni kan ti lo thei lo ang. Chutih rual erawh chuan lungawi tak leh lawm taka min awptute hnuaia awm erawh kan nei chiah lem chuang lo a, phunnawina leh helna a chhuak foin vawi tam tak Bawrhsap ngei pawhin kan hruaitu hmasate kha a zilhhau a nih kha. A chang phei chuan dan hmangin hremna an lekkawh bawk a. Hetianga kan chunga thuneihna an neih theihna chhan hi Scheduled District Act, 1874 dan an hman vang a ni. He dan hi hmang turin kum 1898 khan an lo tihfel tawh avangin kan ram chhungah ngei chuan British sorkar chu ram leilung neitu an lo ni a, chutiang a nih takah chuan kan Lalte ngei pawh chu an ram enkawl tur bik ramrite rinfel sak theihna leh a tul a nih chuan ban theihna thlengin thuneihna an nei ta a ni ber.
Kum 1938-ah British leh German an indo a, Japan pawh German lamah tangin British chu a do ve bawk a, Asia rama Bristish awp ram, Singapore, Malaysia leh Burma-te chu a rawn hneh zel a, reiloteah India pawh an rawn thleng thla ta mai a nih kha. Hetih laia India-a Political Party lian tak Indian National Congress chuan ‘He Indona hi India mite tana indona a ni lo a, British leh Japan indona mai a nih avangin India tana Independent pek min tiam loh chuan kan tanpui thei lo ang che u’ tiin an lo kar ve mek bawk a. British chuan ‘He Indonaah hian theihtawpin min pui ula, hnehna kan chang a nih chuan Independent pek che u kan tum ang’ an ti a. Hetih lai hian Japan lam pawhin British min dopui ula, hnehna kan chang a nih chuan tiin India Independent min lo sawi hmuh bawk a. Tichuan kum 6 zet an indo hnuah German chu May 2, 1945-ah a tlawm ta a, Japan ngei pawh chu America-in an khawpui Hiroshima leh Nagasaki-ah Bomb an thlak avang chuan Sept. 5, 1945-ah an lo tlawm ve leh ta bawk a ni.
Tichuan British hoin hnehna an lo chan takah chuan kum 1945-ah bawk British Parliament inthlanpui neih a niin Prime Minister Winston Churchill, Conservative Party hotupa chu chak zo loin Labour Party chuan hnehna an chang a, Clement Atlee chu Prime Minister alo ni a. A ni chuan India Independent pek mai tha a ti a, nimahsela sakhuanna avangin India thendarh chu Congress chuan tha a ti lo thung si. Chuvang chuan British sorkar chuan a rel fel turin Cabinet Mission tirin India chu March 24, 1946-ah an rawn thleng a, rawtna an rawn siam ta a ni. An rawtna siamte chu hengte hi a ni a:
- India chu Independent Sorkar pakhat pek a ni ang a. British India Provinces-te leh Princely State (Raja) hote an tel ang.
- India Union chuan Executive leh Legislature a nei ang. An Subject enkawl turte chu – (a) Defence (b) Foreign Affairs (c) Communication (d) Finance.
- Province leh Princely State-te chuan Union in a enkawl bak zawng Subject chu an chang ang.
- Indian Province-te chu group-ah then an ni ang:
Group A – Madras, Bombay, United Province, Bihar, Central Province leh Orrisa.
Group B – Punjab, North Western Frontier Province, Sind leh Baluchistan.
Group C – Bengal leh Assam.
- Group tinte hian inzawmkhawmna an nei ang. Group tin chhunga aiawhte kalkhawmin an Group hotute eng chen nge thuneihna pek tur an rel ang. Amaherawhchu Union Subject chu an khawih danglam thei lo ang. Group tinte inzawmkhawmna chu Union a ni ang (Hei hi Federal system ni berin a lang).
Hetianga rawtnate hi siam a nih hnuah Interim Sorkar din a niin Sept. 2, 1946-ah chuan Interim Sorkar chu lakluh a ni a. President atan Governor General niin Pu Nehru chu Government Vice President atan dah a ni bawk. Hemi hnu lawk, Feb. 20, 1947-ah chuan Prime Minister Atlee chuan ‘British sorkar chuan June 1948-ah India a chhuahsan ang’ tih thu a rawn puang a. Chutiang boruak a awm takah chuan Governor General atan Lord Louise Mountbatten chu March 22, 1947-ah ruat a rawn ni ve leh nghal bawk a. A ni phei hi chu Governor General dangte aiin thuneihna pawh an pe sang zawk nghe nghe a ni. Lord Mountabatten hi a fel hrim hrim bakah Nehru nen pawh an thawhhona boruak a tha a, a nupui Edwina Mountbatten nen phei chuan Nehru chu inngaizawng ang hiala sawi a ni a, Nehru hian kutziak ngatin lehkha a thawn thinin Edwina hian alo dahtha zel a, a vai phei chuan 9 Kgs laia rit a ni hial e an ti a ni.
Hetia Lord Mountbatten hruaina hnuaia India a awm lai hian Sakhuana avanga ram inthenna awm hial tura boruak a awm thinin hruaitute lu ti hai tham thil hi a thleng fo a, Congress leh Muslim League hruaitute chu vawi tam an inbe thinin an inrawn khawm thin a. India thendarha Dominion pahnih Pakistan leh India Union siam dan turte pawh an sawi fo thin. Pakistan-ah chuan Sind Province leh Baluchistan Province-te an bet ang a, Punjab-ah pawh Mosolman tam zawkna area chu Pakistan-ah an bet bawkin Bengal-ah pawh Mosolman tamna area chu Pakistan-ah an bet bawk ang. Chutiang tur chuan rawtna pawh Lord Mountbatten chuan Kumpinu sorkarah a thawn thla a. Nimahsela PM Atlee chuan a thuchhuah tawh chu tidanglamin British sorkar chu August 15, 1947-ah India chhuahsan turin a lo tih leh tak zawk avangin India Independent Bill pawh chu chumi huna hman theih turin British Parliament-a pass turin an thehlut a.
British Parliament chuan July 18, 1947-ah India Independent Bill chu a pass a, chumi hnuah chuan India thendarh dan chungchang buaipui turin Boundary Commission a din thar bawk a. Hetah hian Mizo Union hruaitute hnenah pawh thirhrui rawn thawnin ‘Pakistan hnuaia awm in duh loh chuan in duh loh thu Boundary Commission hnenah in hrilh thei ang’ tih thu an rawn thlen a. Reilote hnuah Pu Ch. Chhunga ho chuan ‘Mizoram chuan Pakistan hnuaia awm an duh lo’ tiin thirhrui an zu thawn a. Chuti chuan Aug. 14, 1947 zanah India Constitution Assembly Member-te chu New Delhi-ah inkhawmna an nei a, chutah chuan Nehru chuan he thu hi a sawi a;-
Long year ago we made a tryst with destiny, and now the time comes when we shall redeem our pledge, not wholly or in full measure, but very substantially. At the stroke of the midnight hour, when the world sleeps, India will awake to life and freedom. A moment comes, which comes but rarely in history, when we step out from the old to new, when an age ends, and when the soul of a nation, long suppressed, finds utterance.
The ambition of the greatest man of our generation has been to wipe every tear from every eye. That may be beyond us, but so long as there are tears and suffering, so long our work will not be over. And so we have to labour and to work, and work hard, to give reality to our dreams. Those dreams are for India, but they are also for the world.