MZP General Headquarters hruaitute leh Interim Chin National Consultative Council (ICNCC) hruaitute chuan nimin khan MZP Pisa puiah Meeting an nei a. He Meeting hi H. Lalthianghlima MZP President chuan a kaihruai.
Meeting-ah hian, Chin State Myanmar ram chhunga Zofa hnam hrang hrangte inkarah thawhhona ṭha tak a awm theih nan leh inpumkhatna a awm theih nan hmalakho zel dan tur sawiho a ni.
MZP chuan Chin State chhunga Zofa hnam hrang hrang inkarah, innghirnghona awm mek hi ṭha a ti lo a. Thawhhona tha tak a awm theih nan, ICNCC hi a Meeting pui a. Hun remchang hmasa berah Chinland Council leh Chin Brotherhood bakah pawl dang dang pawh a meeting pui dawn a ni.
Meeting chuan, MZP-in Chin unaute kara inremna a awm theih nana a hmalakna chu tha a ti a. Unau leh Unau karah policy inang lo mahse tharum thawh loh nise tih te, remna a awm theih nan hmalak chhunzawm leh Myanmar rama remna leh mipui sawrkar a din theih nana theih ang anga thawhho nise tihte rilru inhmu taka sawiho a ni.
MZP chuan, BSF ten Zirsangliana Bangladesh a a chhungte a tlawh rawn haw lam ni 5 August, 2024 ah nasa taka an nghaisa hi hriatthiam har a ti hle a. BSF te chat duh dan hi MZP chuan a dem takzet a ni, tiin an thuchhuah chuan an tarlang bawk a.
20 Bn. BSF B.O.P Crocodile, Inspector Harish Sankar Rai leh a ho ten, ramria Zirsangliana an sawisa ngawt mai hi MZP chuan eng vang nge tih sawifiah turin a duh a. Zirsangliana FIR pawh lo dawn sak duh lo mai ni loin, BSF ṭan ngar ngartu Mizoram Police hotu liante pawh inenfiah turin MZP chuan a duh a ni, an ti bawk.