- Ruata
Compact sedan huanga Honda lirthei lar leh India ram pum ang pawha an hralh tam Amaze chu a chhuan thumna model tichhuak turin company lam an inbuatsaih mek a, enchhin mek a ni.
3rd generation Honda Amaze an enchhin lai hi India ram kawngpuiah hmuh tur a rawn awm nalh ta mai a. Hetianga an enchhin hi chuan tunhnai tut tutah a chhuak dawn lo na a, a hnai tawh tih a hriat theih thin a. Honda pawh hian Amaze chungchangah chanchinthar an rawn neih chhoh zui zel a beiseiawm a ni.
Ramchhung kawngpuia an enchhin mek Honda Amaze thar tur hi a pianphung tur leh a landan tur an la thup (camouflage) viau mai a. A lirthei nihphung tur pawh la sawi lawk hleihtheih a ni lo a. Hetihrual hian Honda lirthei dang angin design lamah chuan a hmaa chhuak nena inpersan lutuk a nih erawh a rinawm loh a ni.
Sawi tawh angin Honda Amaze hi compact sedan huanga mi niin India ramah chuan Maruti Suzuki Dzire leh Hyundai Aura te nen a inel thin tlangpui a. He huanga lirthei te hi kawng hrang hrangin an hmang nasa viau a. India ram hmun hrang hrangah khualzin phurh nan pawh an hmang nasa viau a, a hnung bungraw dahna a len that avang hian lirthei tangkai tak, lian si lo a ni.
Compact sedan/sub 4 meter sedan hi a chunglam sedan tho Hyundai Verna, Maruti Ciaz leh adangte aia a danglamna chu meter 4 pel loin a sei zawng siam a ni a. Hei hian chhiah pek tur a tih tlem avangin sedan ni tho niin a man a tlawm thei a ni. Hetiang chiah hian SUV lamah pawh sub 4 meter/compact SUV a awm nual bawk a ni.
Honda Amaze thar tur hian 1.2 litre, four cylinder naturally aspirated (petrol khawl pangngai, turbo tello) a hman leh hmel a. He khawl hian 90bhp power leh 110Nm torque a pechhuak thei a ni. A hnulamah CNG hmang pawh an tihchhuah beisei a ni.
A chhuah hun tur leh a lirtheiin a kentel tur hrang hrang chu kan la hre chho zel turah ngai ang.