Central YMA leh Mizoram Volleyball Association (MVA) te tangkawpin an buatsaih LBS Suzuki 23rd Inter Branch YMA Volleyball Tournament 2024 chu Zirtawpni khan a ni ngana khelh a ni a, champion tura rinkai Hunthar leh Khawhaiin hnehna changin pool final an lut. Zirtawpnia hnehna chang langsar zingah Muana Veng leh Chhinga Veng an tel.
YMA Volleyball a champion lai Hunthar hian Zirtawpnia inkhel hnuhnung berah Hlimen an hmachhawn a, set hloh lovin hnehna an chang. Hunthar hian Hlimen lakah harsatna an tawk lova, set thum an lak zawnahte hian hma an hruai fal vek a tih theih a, 25-15, 25-15, 25-19 in hnehna an chang. Hunthar hian Sihphir an hmachhawn zui leh ang.
Zirtawpni a inkhel dangah YMA Volleyball a pahnihna ni mek Khawhaiin Ngopa an hmachhawn a, an elpui lian Ngopa lakah set hloh hmasa chungin hnehna an chang. Team tha pahnih Khawhai leh Ngopa te hian nidang ang bawkin inkhel hmuhnawm an lantir zui leh. Inkhel tihmuhnawm zual turin Ngopa in set an la hmasa. Set an hloh hmasak hnuin Inter Village Volleyball champion Khawhaiin an thiamna ril an pho lang a, harsa lutuk lovin set hnih an la zawn.
Khawhaiin set hnih an lak zawn hnuin Ngopa an insiamtha a, set lak belh ngei tumin tan an khawh. Ngopa hian set thumnaah 22-18 in hma an hruai fal a, set la in deciding set khelh a ngai ngei tura ngaih a ni hman. Point li ngawta an hnufual hnuin Khawhai hian an namai lohzia an lantir nawn leh a, point 7 ngawt an hmuzawn a, mak tak maiin set an la nawn leh. Inkhel hmuhnawm tak a tawp a, Khawhai chuan Ngopa lakah 22-25, 25-21, 25-20, 25-22 in hnehna an chang zui ta a ni. Ngopa hnehtu Khawhai hian Tualcheng hnehtu Kanan an hmachhawn zui leh ang.
Hunthar leh Khawhai an chak rual hian Muana Veng leh Chhinga Veng ten hnehna an chang ve bawk. Muana Veng hian an khingpui Thingsulthliah chu set thum la zawnin an hneh.
Zirtawpnia inkhel hmuhnawm bera chhal ngam chu Chhinga Veng leh Chanmari West te inkhel a ni. He inkhel hmuhnawm takah hian set hnih ve ve an lak hnuin deciding set khelh a ni. Deciding set-ah hian Chanmari West in 12-8 ngawtin hma an hruai hman a, chak ngei tura ngaih an ni hman. Chak theihna hun tha an neih laiin Chhinga Veng er let an tuar lova, Chhinga Veng hian hnehna an chang let ta daih a, 21-25, 23-25, 25-16, 25-21, 15-12 a chakin hma lam an pan.
Zirtawpni hian hmeichhe lamah inkhel pali a awm a, vawi sarih ngawt champion tawh Bungkawn chuan an khingpui Khawzawl Kawnzar chu set hloh lovin an hneh.