GIG Motors I Day Football Tournament 2024 chu August 9, Zirtawpni khan RG Stadium, Mualpui-ah khelh chhunzawm a ni a, Chawnpui FC lakah an tlawm vangin North East United FC chu semi-final lut zo lovin an in tla. Zirtawpnia inkhel dangah Aizawl FC in Mizoram Police FC an hneh a, Group champion niin semi-final an lut ve thung.
- NEU FC in an puanthuah an tel
Inelna hmachhawn tura state pawn atanga lo kal North East United FC rawlthar team te chuan chak mamawh tak chungin Chawnpui FC an hmachhawn. MPL club chawnpui FC lakah an tlawm zui leh tak vangin khelh thum an tlawm zawn a, GIG Motors I Day Football Tournament 2024 atanga tla felin, an puanthuah an tel zui ta a ni.
MPL club Chawnpui FC hian NEU FC lakah bul an tan tha a, chawlhlawk hmain goal hnih an thun hman. Inkhel tan atanga minute 27-naah NEU F player Robin Chettri chuan an lamah a ti-goal a, Chawnpui FC hmahruaina goal a thunsak. Chak mamawh tak chunga goal an chhuah hmasak vangin Guwahti club North East United an hnual a, an talbuai zui bawk. Chawnpui FC tan hian Lalchhanchhuaha chuan minute 33-naah an goal hnihna a thun zui leh a, si hnih faia hmahruai chungin chawlhlawk an hmang.
Chawlhlawk hnu lamah Chawnpui FC an khel tha chhunzawm a, goal thun hmasa zawkah an tang zui leh. Minute 75-naah Benjamin Lupheng chuan an hmahruana tizau lehzual turin an goal thumna a thun. Hun la tawp em lo mah se Chawnpui FC hian ISL team North Easter United lakah hnehna an chang ngei dawn tih a chiang tawk viau tawh. Si thum ngawta hnufual tawh NEU FC tan hian Dallalmuon Gangte chuan hun tawp dawn hnaih minute 88-naah zangnadawmna goal a thun a, an mualpho thui lutuk tur a thup mawi. He goal a luh hnu hian goal dang a luh belh thei tawh lova, Chawnpui FC chuan North East United FC chu 3-1 in an hneh zui ta a ni. He inkhelah hian Chawnpui FC tana khel tha tak Lalchhanchhuaha chu ‘Man of the match’ ah thlan a ni.
I Day inelna hmachhawn tura lo zin North East United FC hi khelh thum an tlawm zawn a, chak nei lovin an tla chiang nghal. NEU FC lakah chak bawk mah se Chawnpui FC pawh semi-final lut zo lovin an tla ve bawk.
- Aizawl FC an chak zel
Season thara inelna lian Mizoram Premier League leh I Day tournament-a tlawm la nei lo Aizawl FC an chak zel a, ningania an khingpui Mizoram Police FC chu 2-0 in an hneh a, group champion an ni chiang nghal. Aizawl FC lakah chak lo bawk mah se MPFC hian semi-final luh theihna hun tha tak an la nei tho thung.
I Day inelnaah vawi thum chak zawn tawh Aizawl FC hian MPL champion MPFC lakah bul an tan tha viau a, goal pawh an thun hma hle. Inkhel tan atanga minute 10-na lekah Lalhriatpuia chuan hmahruaina goal a thun a. ‘Man of the match’ a thlan zui tak Lalhriatpuia hian minute 40-naah an goal hnihna a thun zui leh a, a goal hnih thunte hi Mizoram Police FC lakah an chakpui zui ta a ni.
Mizoram Police FC lakah an chak leh tak vangin Aizawl FC hian khelh li atangin point 12 an hmu a, group champion niin semi-final an lut. AFC laka chak lo MPFC hian khelh thum atangin point ruk an hmu mek a, khelh hmabak vawi khat an la nei a, an chesual viau a nih loh chuan semi-final lut tura ngaih an ni.