18th Lok Sabha Parliament Session neihah a vawi khat nan Mizoram MP Richard Vanlalhmangaiha chuan Zero Hour-ah nimin khan thu sawiin, Vawk hrileng (ASF) vanga Mizoramin harsatna kan tawhte a auchhuahpuia, tanpuina awm thei angte ngaihtuahpui thuai turin sawrkâr laipui a ngen.
Parliament Session neihah hian Richard Vanlalhmangaiha chuan “Official record-a a lan dânin February 2024 atanga vawiin thlengin ASF avangin vawk 8251 thi tawhin, vawk 15,000 chuang suat an ni tawh a, vawk vulhtute sum luangral zat chu cheng vaibelchhe 200 chuang zet a ni”, tiin, hrileng vanga vawk thi la chhinchhiah loh eng emaw zat a awm thu a sawi bawk.
Richard-a chuan tun hnai mai ni lovin tun hma atang tawhin ASF hian Mizoram a tihbuai tawh thu a sawi a, vawk vulhtu tam berte chu loan hmanga, ranvulh eizawnnana hmang an nih thu leh, an tawrhna a nasat thu a sawi.
Lok Sabha M.P Richard-a chuan Union Minister of Animal Husbandry chu ASF avanga Mizoram tawrhna chungchangah chhawmdawlna ngaituahpui tura ngenin, ‘Vawk vulhtute chhawmdawlna tur project proposal Rs vaibelchhe 26.725 chu sawrkâr laipuiah thehluh tawh a ni a, hetih lai hian vawk thi leh vawk suatte avanga vawk vulhtute chhawmdawlna tur sum leh pai engmah dawn a la ni lo”, a ti a, M.P hian ngaihtuahna thar sênga Mizorama vawk vulhtute harsatna hriatthiampui tur leh, hma lâk pui thuai turin Sorkar laipui leh Union Minister for Animal Husbandry a ngen a ni.