- Reuben Lalnunthara Hnamte
Tunlai khawvelah mi mal chhungkaw tin mai hian kan buaipui ber pakhat chu Rosum hi ni awm e. Rohlu neih tur ngaihtuah reng reng hian nit la vanvuaiiin leh ngaihtuahna pawh chawl lovin hna kan thawk a, kan buapui mup mup a ni ber mai. A nei tamin neih belh zel an duh a, a nei lovin neih dan kawng an ngaihtuah bawk a. A mawi leh mawilo lam, a thianghlim leh hlim lo lam ngaihtuah hauh lo hian rosum kan neih theihna a nih dawn phawt chuan mahni hmasial takin kan bawh huam huam a ni ber mai. In leh lo tha, car man to, bungraw manto leh tha neih kan duh a, a then phei chuan ram pakhat mai pawh duhtawk lovin, inhmun lo ram neih belh duhin kan phe sek bawk a. He hringnunah hian duhtawk chin reng a awm lo; neih belh duh reng reng hian kan phi sek mai zâwng a nih hi. Khawvel sorkar lian leh te pawh in el reng rengin, ralthuamah nen, ram hauhsakna kawngah nen nan hmanhlel a ni ber mai. America hauhsak zia kan hria, China chuan lehpelh tumin a hmanhlel a, China pawh tunah chuan ram hausa leh ropui tak a ni tawh a, America hi a la lehpel lovang tih pawh a sawi theihlova, China hmasawn zia pawh kan hre theuh awm e.
Kan sawi tum tak zawk chu chhungkua chung chang hi a ni a. Khawvel hi chhungkaw tam tak ni a, inthlahpung turin Pathian min ruat a. Mihring hi kan lo pianchhuah dan chu nu leh pa atangin emaw, mipa leh hmeichhia atangin a ni a. Khawvel lo awmtirh atangin chhuan tam tak a lo awm tawh bawk. Chhungkua inthlahchhawng tam tak khawvelah kan lo awm ta a, tunlai hun a mite pawh hian kan lak atangin thlah tam tak kan la hringchhuak dawn a ni. Mi tamber hian hmanlai atang tawhin kan lak atangin thlah tam tak an la piangchhuak dawn tih hi an ngaihtuah pha ngai lo va, tunlai thangthar zawkte pawh hian chu chu kan chhut ngai mang kher lovang. Nu leh pa tam tak chuan kan fate an nuamsa lovanga, kan chhungkua mite hmuhsit an ni ang tih hlauvin nasa takin an tang a. Chhungkua rosum ngaihtuah hian nu leh pa tam tak chuan kan hmanhlel a ni. Amaherawhchu, kan hriat hmaih thin chu enge kan chhungkaw tana Rohlu ber hi tih hi a ni. Sum leh pai neih ta, in leh lo leh ram, bungrua neih tamte hi rohluah kan ngai tlangpui a ni. Chutiang chuan nu leh pa tam tak hian chhungkua ngaihtuah hman lovin, chhungkua a nuamsa lovang tih hlauvin, rosum leh pai zawngin kan hun kan hmang thin.
Nu leh pa tam tak chu YMA ah, association ah, partyah leh kohhranah te a kul atai an ni a, eizawnna lam buapui nen, chhungkua ngaihsak hman lo nu leh pa tam tak an awm. Hengte hi a tha lo vek tihna erawh a ni lo; amaherawhchu, a tawk chin leh chhungkuaina a tawrh lohna tur kan zawn thiam erawh a pawimawh hle. Mizoram hmuh hi ka fang hnem tawh hle a, kan pemkual nasa tawh bawk a, ka tawn leh ka hriat hi tam tak a awm ve tawh. Chhungkaw pakhat chu an nu leh pa sorkar hnathawk an ni a. An khawsa thei khawp mai a, khawtlangahte kohranah te an inhmangin mi ngaihsan leh ngaihhlut pawh an hlawh thin. In leh lo tha tak an nei a, bungrua tha tak tak nen, inhmun lo ram an nei nual bawk a. An fate pawh an nuamsain mite pawhin phakloh enin an en thin. Nimahse, an nu leh pa te an han boral ta a, an chhungkua chu a buai ta nuaih mai. An faten ro an inchuh a, unau an inhmuthiam lova, mite ngaihsan leh zah chhungkua kha an nu leh pa an han thih meuh chuan mite thlir dan pawh a dang ta daih mai a ni. Chu chu engvangnge kan tih chuan- an nu leh pa te khan khawtlanga hmingthat leh rosum neih tam ngwt an ngaihtuah a, an fate nungchang an lo ngaihthah lutuk kha a ni.
An fate tan hun an pe ngai lova, an fate nun an siam hek lo; an rosum tak zawk chu an fate kha an ni tih an hriatloh vang a ni. An fate kha lehkha thiam leh chhawr tlak an awm hek lo. Bible a kan hmuh puithiam Elia pawh kha, puithiam zahawm tak a ni a, mahse, a fate a thunun lova, an nungchang thatna turin a zilhhau tha lo va, Pathianin amah kha hremna a pe ta zawk a nih kha. Kan fate hi he khawvel kan rohlu ber elh ka rosum an ni tih hi kan hre lova, kan theihnghilh thin avang hian a hunlaiin han vung viau thin mah ila chhungkaw kehchhiatna, kan thlahte thlenga belhchian dawl lo chhungkua kan din thin a ni. Khawtlang, kohhran, politicsah hmingthat kan duh a, chhungkaw lamah kan tlaran hle lawi si. Billy Grahama a upat hle tawh hnua a damloh lai a an zawhna ah chuan “ lo damchhuak leh ta la, enge I ngaihpawimawh ber ang ’ tiin an zawt a. Ani chuan “ kan fate leh chhungkaw tan ka hun tamber ka hmang tawh ang” tiin a chhang a ni. Chhungkaw tan, kan fate tana hun kan hmang tam lo lutuk leh chhungkua kan ngaihthah hian pawi thui tak, inchhirna siamthat theih tawh si loh min thlen thei a ni.
“ Khawtlanga sualna hi, chhungkuaah zung a kaih dan chhui lova siamthat kan tum chuan kan hlawhchham ang – Dr. Keneth Chafina chuan alo ti a ni. Kan chhungkua, kan fate hi khawvela kan rohlu ber leh rosum an ni tih hriatchian a pawimawh hle a. Khawtlang sualnate, ram sualnate pawh hi chhungkuaah hian a bultanna a nih avangin chhungkua hi khawtlang leh ram thatna tura a bul a ni tih hi hriat a pawimawh em em a ni. Thiante bulah leh pawn lama fel tak, nui huau huau, pa nelawm, leh nu fel ta kanga langte pawh chhungkuaah chuan ancheh tak, nupui/pasal leh fate tana nelawmloh leh kha tak si kan nih chuan eng anga rosum ngah leh mi challang pawh ni ila, kan hmabak chu chhungkaw tha lo tak dinchhuah a ni thei a ni. Fate tana rosum leh rohlu tam tak hnutchhiah tum aiin, anmahni eitlak tur leh thawkchhuak thei tura buatsaih hi a hlu zawk. “ I fate Pathian lam kawng i zirtir loh chuan Setana’n sual kawng a zirtir ang- Charles H. Spurgeona chuan alo ti bawk. Thlarau mi leh kohhrana inhmang ta kanga pawn lama kan lan lai hian kan fate nunkawng dik leh Pathian thu a kaihruai lo mi a nih theih a ni.Chhungkua leh kan fate bulah awm tam tum ila, kan fate zirna tha leh nunkawngdikah hruai ila, chu chu chhungkaw rosum hlu ber chu a ni e.