Zirtawp zan khan Olympic Football final khelh a ni a, inkhel hmuhnawm takah Spain chuan 5-3 in France an hneha Gold Medal an hlawhchhuak.
Parc des Princes-ah inelna thlengtu France leh Spain te an inhnehtawk viau a, goal pawh a lut hma hle. Inkhel tan atanga minute 11-na lekah Enzo Millot chuan France hmahruaia goal a thun. Hma taka goal an thun vangin phur viau mah se France an phur rei lova, an goal thun hian Spain a chhaihkawlh chiang viau a, Spain hian goal thum ngawt an thun zawn.
Spain tan hian Fermín López chuan minute 18-naah goal thunin an si phurh a sut. 1-1 a nih hnuin Spain an khel tha chhunzawm a, goal an thun leh thuai. An si phurh a sut atanga minute sarih hnu lekah Fermin Lopez chuan Spain hmahruai letna goal a thun leh nghal zat. Inhnaihchilh taka goal an chhuah vangin France an talbuai a, goal an chhuah leh thuai. An khingpui talbuai lai nangchingin Spain tan hian Álex Baena chuan minute 28-naah an goal thumna a thun a, 3-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal hnih hmuh tur a awm belh leh. Inelna thlengtu France in an si phurh sut ngei tumin tan an khawh a, hun tawp dawn hnaiah an vannei. Maghnes Akliouche chuan minute 79-naah goal thunin an si phurh a sut then. An si phurh sut zawh ngei tumin tan khawh zui mah se hun pangngaiah an si phurh an sut thei lo phawt. Hun pek belh tawp dawn lamah France hi an vannei zui leh a, penalty an hmu. He penaly hi inelna kal meka khel tha tak Jean-Philippe Mateta chuan a pet goal a, an si phurh sut zovin tlawm an pumpelh nge nge. Mateta goal thun hnu hian goal dang a luh belh thei tawh lova, extratime khelh chhunzawm a ni.
Extratime-ah Spain an chungnung zui ta viau a, goal hnih an thun. Sergio Camello chuan minute 100-naah hma an hruai nawn lehna goal a thun. France in an si phurh sut tum viau mah se Camello hian minute 120’+1-ah an goal ngana a thun zui leh a, an chakna a nemnghet. Camello goal thun hnu hian hun a tawp zui a, Spain chuan Gold Medal an hlawhchhuak zui ta a ni.
Spain hi Olympic football a an champion hnuhnun ber tum chu Barcelona Olympic 1992 kha a ni a. Hun rei tak hnuah an champion ve leh ta nawlh a ni. Spain senior team te Euro 2024-ah an champion a. Under 23 team Olympic-ah an champion zui ve leh a, hei hian football a Spain hmabak enzia chiang takin a lantir.
Spain in Gold Medal an lak lai hian Bronze Medal match-ah Morocco chuan Egypt an hneh a, an vawi khat nan Olympic Medal an la ve bawk.