CYMA leh Mizoram Volleyball Association te tangkawpin an buatsaih LBS Suzuki 23rd Inter Branch YMA Volleyball Tournament 2024 chu khelh chhunzawm zel a ni a, Thawhtanni khan mipa lamah last 16 khelh zawh a ni a. Quarter-final-ah champion lai Hunthar in Khawbel an hmachhawn dawn. Mipa lamah last 16 khelh zawh a nih laiin hmeichhe lamah quarter-final khelh zawh a ni ve thung a, champion lai Bungkawnin semi-final an lut.
YMA Volleyball-ah vawi thum champion tawh Hunthar hian Inrinni khan set hloh lova Sihphir hnehin quarter-final an lo lut tawh a. Thawhtanniah set hloh lova Keitum hnehtu Khawbel an hmachhawn zui leh dawn a, Khawbel nen inkhel hmuhnawm an lantir thei tura ngaih a ni.
Pro Volleyball league khel tur Khawbel hian Keitum lakah bul an tan tha viau a, harsa lutuk lovin set hnih an la zawn. Set hnih an lak zawn hnuin set thumnaah fiahna hautak an hmachhawn a, game inbuktawk takah point hnihin an sang fal thei hram a, 25-17, 25-18, 25-23 a hnehna changin quarter-final an lut. Pro Volleyball League khel tur an nih vanga Volleyball a boruak nei lian khua, Lal Albert-a vanga mite hriathlawh leh an nula leh tlangval taima tak takte vanga mi ngainat Khawbel hian champion lai Hunthar an hmachhawn zui leh dawn a. Volleyball a hniam lai nei lo Hunthar an hneh thei a nih ngat chuan Volleyball khawvel-ah an hming an chher lian leh zual hle ang.
Thawhtannia inkhel dangah vawi thum champion tawh Maubawk chuan set khat hloh chungin Ruallung an hneh a, Khawhai hmachhawn leh turin quarter-final an lut ve bawk. YMA Volleyball final an luh tawha la champion vek Maubawk hian Ruallung lakah set an loh hmasa teh tlat. Set hloh hmasa zawkah tang mah se tha takin an thochhuak a, 19-25, 25-18, 25-16, 25-23 in an chak let. YMA Volleyball inelna hnuhnung bera pahnihna leh Inter Village Volleyball competion hnuhnung bera champion Khawhai an hmachhawn zui leh dawn a, vawi li champion thei hmasa ber ni turin fiahna hautak an hmachhawn zui a ngai dawn.
Thawhtannia inkhel dangah Dinthar chuan 23-25, 25-14, 25-22, 25-11 in Hmuntha an hneh a, quarter-final-ah Muana Veng an hmachhawn zui leh dawn. Dinthar rual hian Tuikual North pawhin straight set in Thentlang an hneh a, Chhinga Veng hmachhawn turin quarter-final an lut ve bawk. Mipa quarter-final hi vawiin chawhmar dar 9:30 atangin khelh tan a ni ang.
Mipa lamah quarter-final lut a hriat kim rualin hmeichhe lamah quarter-final khelh zawh a ni ve thung. Hmeichhe quarter-final hmasa berah champion lai leh vawi sarih ngawt champion tawh Bungkawn chuan 25-04,25-22,25-12 in Luangmual an hneh a, semi-final an lut. Semi-final-ah an mahni ang thova vawi sarih champion tawh Kanan an hmachhawn zui leh dawn. Kanan hian an khingpui Thenzawl Field Veng chu 22-25, 25-17, 25-16, 17-25, 17-14 in an hneh hram a, harsa takin semi-final an lut.
Hmeichhe quarter-final dangah Armed Veng South leh Vaivakawn ten semi-final a intum zui turin hnehna an chang bawk.