- Dr. C. Lalrampana
- A KAMKÊUNA
Zirtirtu chu sikul emaw college emaw, zirna in hrang hranga sikul naupang, zirlaite hnena thiamna petu, hriatna hlan chhawngtu a ni. Chinese philosopher Confucius (6th-5th BC)-a hi khawvela zirtirtu hmasa ber nia ngaih a ni. Private tutor a ni a, history zirtirtu a ni. Tun hma chuan lal pawl emaw, mi ropui emaw chauhvin zirna an hmu thei a. Confucius-a erawh chuan he ngaihdan hi a thlak danglam a, zir duh apiang a zirtir thin a ni. Zirtirtu chu a pawimawh hle a, zirtirtu tel lovin zirlaite’n thiamna, finna leh hriatna tluantling an hmu thei lo. Gandhiji chuan-”Naupangte zirlaibu text book pawimawh ber chu zirtirtu a ni” a ti. A va dik tehlul êm! Zirtirtu nunchang tha lo leh nungchang mawi lo; ruihhlo bawiha tang leh khawsak tha lote chu zirlaite tan hruaitu mitdel khuarkhuruma tlakpuitu a ni. Chuvangin, zirtirtu chu nungchang tha, mifel, entawntlak,hmangaihna ngah, mi nunngil, kawngtinrenga mite entawntlak a ni tur a ni. Tunlai zirtirtute zingah zu leh ruihhlo bawia tang, khawtlang leh ram tana hnawksak, mahni zirlai naupangte khuaikhem ching hmuh tur leh hriattur an awm nual thin. Zah nachang lah an hre der si lo. Chuvangin, thuneitute pawh hian zirtirtu lak hi an fimkhur a ngai hle a ni. Zirtirtu chihrang hrang an awm; a nghet leh nghet lo te, mi aiawh leh hun bik bituksak chite thlengin an awm.
- MR TEACHER
Muster Roll tih hian factory/work unit site-a attendance management atana hnathawkte list a kawk a. “Factory-a hnathawkte hminglamna register” tia sawi theih a ni bawk. Maritime law chungchang sawi dawn chuan Muster Roll hi shipmaster’s account a ni a, lawnga manager–te pawh tiamin hnathawk zawng zawngte list kimchang a ni. Details-ah hian hnathawk tinte hming, kum, hnam, etc. te a tel. PWD hnuaia kawng siam hlawhfa (labor)-te list an hman thin hi MR tia kan hriat lar thin ber kha a ni. Sorkar department hrang hrangah pawh MR chu an awm nual bawk. MNF Ministry (2018-2023) lai khan khawvela a awm vawi khatna ni hiala lang MR Teacher 881 vel lai lâk (engaged) a ni a. An khua leh district mila duhsak an nih avang khan an quality leh efficiency erawh a chuti lua lem lo niin a lang. Zirtirtu pangngai lo, zirtirtu phuah chawp an nih avangin anmahni ngei pawhin inrintawkna an tlachham thin niin a hriat theih a, zirlai leh nu leh pa, khawtlang thlengin an hmuh dan a pangngai lem lo mai thei. Zirtirtu indaih lo hnawhkhah nana tih satliah mai an ni ber awm e. Hei bakah hian SEDP Teacher phuahchawp lehzual mi 777 vel lai lak a nileh a, anniho phei hi chu MNF Party Unit lamin anmahni mi leh sa duhsak zawng zawng an hnawhlut mai nia sawi a awm a, an quality vak lem lo mai thei. Mahse, an thawk tluan ve thak tho niin a lang.
- CASUAL TEACHER
Casual tih hi mizotawng chuan-a kahpah; a palh; a chãng chãng; ngaihsam; urhsun lo tihna a ni. Sorkar department leh zirna In hrang hramgahte zirtirtu nghet pangngai ni lo, a kahpaha kal , zirtirtu kahpah emaw, Radio leh Doordarshan lamah chuan thupuangtu kahpah/lailawkte an awm thei bawk. Tin, tuna mipui sorkar, ZPM Ministry hian a hmaa mite ang bawkin a hming dang vuahin Casual Teacher tiin primary sikul atan 648, middle sikul atan 371 leh high sikul atan 350, an vaiin 1,369 lãk a ni a. Chung zingah chuan primary sikul atan lak mi 148, middle sikul atana lak mi 138 leh high sikul atana lak mi 68-in an declined. Casual teacher declined hi lak zat atanga chhutin 25.86% a ni. Personal interview neih lai khan heng decline-tute hi “khawii hmunah pawh dah dawn se an inhuam em?” tih an zawt lo em ni? Hetiang taka decline-tu tam hi thil thleng zen zen a ni lo.
- TUTENGE QUALITY ZAWK?
Zirtirtu lak danah MR Teacher lak dan kha diltute chenna khua leh district milin an la a, a felfai hle nia ngaih a ni a, chutih laiin an quality leh efficiency lamah erawh an chuti lua lem lo niin a lang. Tun tuma ZPM Ministry-in casual teacher a lak dan erawh a felfai tehnuai lo niin a lang. Hei hi a thawktu department lamten ngaihtuahna an sen tawk loh vang nge a changtu minister-in a ngaihven tawk lo zawk? An quality & efficiency lamah erawh practical teaching nen thlap kalpui a nih avangin Casual Teacher-te hi an tha zawk ngeiin a rinawm. Mahse, casual Teacher lak tawh zawng zawng 1369 atanga 354 (25.86%) zetin an hna an hnãwlleh si hi hlawh a beitham an ti nge, an dahna (posting place) hrehawm vang nge tih chu zawhna lian tak a ni ta? Sorkar pawh hian bengsika a ngaihtuah chu a ngai a ni.
- A TLÃNGKAWMNA
Zirtirtu pawimawhzia leh uluk a ngaihzia te, zirtirtu nghet leh nghet lo, MR Teacher, SEDP Teacher leh Casual Teacher-te danglamna leh an dinhmun kan hre ta. Khing zirtirtu nghet lote khi political party-te’n an hamthatna ngaihtuaha an lãk deuh vek niin a lang a. Chuvangin, kan ram hruaitute hian zirna hi an politicalise ni berin a lang. Zirtirtu nghet post ruak tam tak a awm a; a nghet lo, phuahchawp lak vak vak ai chuan kumtin a tahtawlin a nghet lo lak nana senso mil tawk zelin post ruakte hi hnawh khat thin se; tin, zirtirtu pisa lama an pawhpen zozaite hi an hna diktakah hnukkirleh vek bawk se zirtirtu nghet mumal takin semzai thlap bawk se. Tu ministry mah hian zirna hi politicalise lo bawk se kan Zoram zirna hi a tha anga a changtlung zawk ngei ang. Hetiang renga zirna hi kan kalpui chuan central service leh IAS Officer etc. te kan nei tlem tial tial anga hnam dangin min la awpbet vek mai ang tih hi a hlauhthawnawm ta mek niin a lang. Chuvangin, sorkar hian kan zirna dinhmun mek hi ngaihtuahin kalphung thar tha zawk leh rintlak zawk zawng chhuakin tihtakzetin hma la se a lawmawm ngawt ang.