- Laiu Fachhai
Power Politics hi international politics a hman deuh ber a ni thin a, Political Science lama kan mithiamte chuan chiang zawkin leh zau taka hrilfiah tur an neih teuh ngei ang. He article atan chuan tawi felfai leh mawlmang deuhin hrilfiah ila a tawk mai awm e. Power Politics tih chu, thil dik a nih leh ni loh lam ngaituah chuang lem lovin leh dikna leh mihring pianpui chanvo (human right) khawih thei thil a nih leh nih loh lam pawh ngai pawimawh em em lo va, population, sum leh sipai chakna (power) te hmanga politics kalpui a, an duh zawng tihpuitlin nan leh hnehna chan tumna politics a ni. Chu power politics chu Israel leh Palestine buainaah pawh hian hmuh theiin a awm a ni.
Mizoram dinhmun atanga thlir chuan, sawrkar cheltu mitlemte ten an thuneihna chu anmahni mimal, an chhung leh khat, vua leh vang, thian tha leh lainate leh an party mi leh sate duhsakna leh hamthatna atan an hman emaw; an sahimna tur leh an hlawkna tur atan an thuneihna hmangin sawrkar dan leh hraite an palzut emaw; mirethei leh mihnuaihnungte rapbet a, milian leh mihausa thil tisualtute humhalhna atan an thuneihna an hman emaw; an duhsakten chanvo tha an neih theihnan influence peddling tihna atan an hman emaw te a nih chuan, power politics an kalpui tihna a ni. NGOte leh pressure group dangte ina an duh zawng leh an thil phutte tipuitlin nana kawng zawh, boycott, blockage leh action thenkhat an kalpui dan te pawh hi power politics a nihna lai a awm ve. Assam leh Mizoram ramri chungchangah pawh hian power politics a lo lang zel ang.
Politics hrim hrim hi power (thuneihna leh thiltihtheihna) a ni a, chu power chu mitlemte kutah a awm a ni. Democracy ramah chuan thuneihna hmannaah check and balance a awm theihna atan Executive, Legislative leh Judicial branchte awm mahse, thuneihna tak tak erawh chu Executive Branch, Prime Minister/Chief Minister leh Ministerte kutah a awm a ni. An thuneihna a lian hle. A tul hunah chuan force (sipai/police) te pawh an hmang thei a ni. Dikna, rinawmna leh hmangaihna nunte nei a, taima taka an mawhphurna hlentute an nih chuan, power neitu roreltute chu mipuiin an zah a, an kaihhruaina hnuaiah chuan ram mipuite an hlimin an thla a muang thin.
Roreltu thenkhat, a bik takin power politics hmang thinte erawh chuan, an power an thlah phal tawh thin lo. Sipai rorelna leh dictatorship rorelnate chu thu hran ni sela, mipui thlantlin roreltu thenkhatte pawh, a tirah chuan democracy taka thlantlinte ni hlawm mah sela, dictatorship lamah lutin, chhuanlam chi hrang hrang leh inthlanna kalpui dan dik tawk loh (election fraud) te hmangin, power chelh reng an tum thin. Chuvangin hmun thenkhatah chuan, mipui thuneihna leh thiltihtheihna (people power) hmangin dictatorship leh dik lo taka rorelnate chu tihtawp a ni thin. Chu chu Arab Spring an tih leh tunhnaia kan thenawm ramahte pawh hian hmuh theihin a awm a ni.
Indiaah erawh chuan zalenna kan hmuh atangin tun thleng hian tha takin leh thlamuang taka thuneihna inhlan chhawnna (peaceful transition of power) kan nei thei zel a, kan vannei hle. An term a tawp a, thlantlin an nih tawh loh chuan, thlantlin tharte hnenah thuneihna an hlan chhawng thin. Democracy puitling ram kan nihna a lang chiang hle a ni. Mizorama State sawrkar, Autonomous District Councilte, Municipal Corporationte leh Village Councilteah pawh chutiang chuan peaceful transition of power a awm thin a, a lawmawm hle.
Sawi tawh angin, hmun thenkhatah chuan sawrkar cheltuten thuneihna lian tak an kuta awm chu, power politics hmangin anmahni mimal, an chhung leh khat, vua leh vang, thian tha leh lainate leh an party mi leh sate duhsakna leh hamthatna atan an hmang thin a ni. An thuneihna lian tak chu, mirethei leh mihnuaihnungte rapbet a, milian leh mihausa thil tisualtute humhalhna atan an hmang a, an duhsakten chanvo tha an neih theihnan influence peddling tihna atan an hmang bawk a, an sahimna tur leh an hlawkna tur atan sawrkar dan leh hrai palzutna atan an hmang bawk thin.
Chutih lain kan Mizoram State sawrkar hrawn mek erawh hi chuan, power politics kalpui lo a, “KALPHUNG THAR, MIPUI SAWRKAR” tih thupui hmanga diknaa rorel duh sawrkar nih a tum a, a lawmawm tak zet a ni. Ram mipuite pawhin an lakah beiseina kan nei sang hle. An thupui hi lehkha thu mai ni lovin, lehkha leh thlarauva hlen ngei an tum niin a lang a, beiseina a tithar leh a ni. “Thu chauhvin i hmangaih suh ang u khai, lei chauhvin i hmangaih hek suh ang u, thiltih leh tihtak zetin ni zâwk rawh se,” (1 Johana 3.18) tih Pathian Thu hi an rorelna leh ram an hruainaa an nun leh thiltih kaihruaitu atana hmang zel turin ram mipuiten kan ngenin kan duhsak a ni. Rorelna dik leh tha hnuaia ramin hma a sawn theihna atana an thuneihna lian tak chu power politics nih tir lo a, inngaihtlawmna, dikna, rinawmna leh hmangaihna nunte nena rualkhai taka hmang zawk tumtu sawrkar kan neih chu, Mizoram hmalam hun tur ngaihtuahin a eng tha a, a hlimawm hle a ni.
Isua erawh chuan anniho chu a ko va, an hnênah, “Jentail-te chunga rorêltua an ruatte chu an chungah an lal êm êm ṭhîn a, an mi liante chuan an chungah thu an nei êm êm bawk ṭhîn tih in hria. Nimahsela, nangni zîngah zawng chutiang a ni lo vang; tu pawh in zînga mi lian nih duh apiang chu in rawngbâwltuah a awm zâwk tûr a ni. Tu pawh in zînga hmasa ber nih duh apiang chu mi zawng zawng chhiahhlawhah a awm bawk tûr a ni. Mihring Fapa meuh pawh rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe zâwk tûrin a lo kal a ni si,” a ti a (Marka 10.42-44).