ZPM chuan an Party Office-ah nimin khan chhung inkhawm hun a hmang a, thusawitu Home Minister K.Sapdanga chuan, “Ration Card, Assam ramri leh Airport chungchangahte thu belhchian dawl lo hmanga eptuten mipui rilru hruaipen tuma an tithlabar fo hi a pawi takzet a, mipuite nuihzat leh rin loh an hlawh phah zual thei,” a ti.
K.Sapdanga chuan Ration Card chungchang sawiin, “Eptu party-ten ration card chungchanga mipui thu an fah dan hi a dik tawk lova, chhungkaw khawsak ziaawm zawk Ration Card var hmangtuten sawrkar atanga buhfai Subsidy-a an leina man tihsannaah hian chhungkaw harsa zawkte Ration Card Eng (yellow) leh Ration Card Pawl (Blue) hmangtute a huam lo tih kan hriat a tha. Tunah hian Supply Minister hmalaknain Ration Card siam that hna kalpui mek a ni a, chhungkaw khawsak harsa zawkte tan phurrit tur a awm lo,” a ti. “Tunhnai khan Assam lamin an duty camp bul leimin an thianfai a, hei hi eptu party lamin mipui tihthlabarin nan hmangin thu an vawrh darh leh vak mai a, hetianga thu belhchian dawl lo hmanga mipui rilru an kuai peng thin hi a pawi ka ti hle. Tunhnai khan Assam Sorkar nen pawh ramri chungchangah tha takin meeting kan nei a, hmasawnna kan hmu chho mek a ni. Tin, Airport chungchangah pawh Mizoram tana tha tur zirchianna neih anih chauh laiin, eptu party lam chuan thutlukna siamfel ta ang maiin thuthang dik lo an lo vawrh darh leh chiam mai hi a pawi ka ti hle a ni,” a ti bawk.
Home Minister K.Sapdanga chuan, “Sawrkar tha nei tur chuan Opposition party tha tak neih a ngai a, Zoram mipuiten Eptu Party tha tak min pe hi lawmawm hlein ka hria a, sawrkar leh mipui tan malsawmna ropui tak an ni thei a ni. Chutih laiin Opposition Party-te pawhin sawrkar tihbuai tum nan thubelhchian dawl lo an hmang fo a, hei erawh mipui nuihzat leh rin loh hlawh theihna a ni,” a ti.
Sapa chuan, “Kan hma lawkah AMC By-Election kan hmachhawn dawn a, vanduaithlak takin March ni 21 khan Ward No-VI Bialtu Corporator fel tak John Zosangliana Ralte chuan hun lo takin min boralsan a, a pawi kan tiin Ward mipuite kan tawrhpui a ni. John Zosangliana Ralte hmalakna chhunzawm tur hian mi tha tak H.Lalremtluanga Chanmari West kan sawm a, ani hi Kohhran Upa a ni a, Ward VI mipuite pawhin duhsak taka min lo vote tlin sak turin kan ngen che u a ni. Chutih laiin, Party liana kan lo ngaih pahnih ten ZPM party naupangte beihrawn tura ruahmanna an han siam ta mai hi, an in hmu te hle niin ka hria a, an mal din ngam ta lo hi mipui mak tih an hlawh hlein ka hria. Ward No.VI-a kan party worker-te thawhrimna chhuanawm ka tiin, thawkrim ten malsawmna an dawng thin a, Corporator thar kan neih ngei ka beisei a ni,” a ti bawk.
Minister chuan, “Tun hnaia kan lungkham ber chu aikal tihbo hi a ni a, thenkhat chuan min huphurhpuiin kan tih theih an ring lo hial a, sawrkar hmalaknain department tinah aikal an neih leh neih loh zawh a ni a, aikal ti tawp tura thuchhuah siam a ni bawk a, ti tawp lo department an awm chuan department hotuten mawh an phur dawn a ni. Aikal tih tawp avang hian mipuiin harsatna engemawchen chu kan tawk ngei dawn tih hi sawrkar hotuten an hmu tlang vek a, amaherawhchu huaisen taka ram siamthat hna kalpui a ngai a, mipui pawh kan chhel a ngai hle, hun a kal anga thil a la rawn inher dik mai dawn a ni,” a ti.
An Party chhung inkhawm hi Lalthlamuana General Secretary-in a kaihruai a, Lalnunthara Pautu, Secretary, Upa Committee chuan hunserh hmangin Lalliansawta, President chuan mithar lawmluhna hun a hmang a, lawmluh aiawhin Er.Lalthakima, Ramhlun North chuan thu a sawi bawk. Party chhung inkhawm hi Dr.Vanlalthlana, Minister bakah MLA leh Party hruaitu thahnem takin an telpui a ni.