Khawvela tualchhung league lian leh ngaihhlut hlawh ber English Premier League (EPL) season thar tan hun a hnai a, August ni 17, Zirtawp zan atangin khelh tan a ni dawn. Chhuak hmasa lam khan Supercomputer in EPL 2024/25 ah champion tura Manchester City a rin thu kan tarlang tawh a. Tun tumah hian thu thar thehdarhtu lar leh rintlak tak BBC Sport in EPL 2024/25 a champion tura a rin leh tlahniam tura a rin kan tarlang ve leh ang.
- 1. Manchester City :
Supercomputer ang thoin BBC Sport chuan EPL 2024/25-ah Manchester City an champion an ring ve bawk.
Pep Guardiola enkawl Manchester City hi EPL-ah vawi li champion zawn thei hmasa ber an ni a. An record siam tizau a, vawi nga champion zawn thei hmasa ber ni thei dinhmunah an ding. Ropuina rama hruai thlengtu Pep Guardiola-a’n a la enkawl zui tur hi an dinhmun that bikna a ni thei. City elpui lian tur zinga ngaih Liverpool chu Jurgen Klopp-a’n a chhuahsan a, manager thar Arne Slot-a’n a enkawl dawn. Manager thar Slot hnuaiah hma an sawn hluai thei a, an talbuai viau thei tho bawk. Liverpool ang thoin Chelsea pawhin manager thar Enzo Maresca an nei a. Enzo Maresca leh a hote tan City elphak a la har hret tura ngaih a ni. Manchester United in an manager Erik ten Hag an ruai chhunzawm dawn a. Inelna dangah champion pui khauh thin mah se Ten Hag hnuaiah United hian City lehpel turin rin an kai tak tak thei lo.
City hian manager an nei tha a, player an nei tha em em bawk. Season liam taah EPL Player of the season leh FWA Footballer of the year chawimawina dawng kawp thei Phil Foden a chhe thut dawn lo. League harsa bera ngaih EPL a top-scorer ni zawn thei Erling Braut Haaland-a’n a thiam a theihnghilh thut dawn lova, Jeremy Doku a nep sawt dawn hek lo. City hian Saudi Pro-League pan tur anga sawi midfielder ropui Kevin de Bruyne an kawl chhunzawm thei dawn tih a chiang ta bawk a. Atletico Madrid lamah Julian Alvarez hralhchhuak mah se City tlar hma an bil pha lutuk lo tura ngaih a ni.
Midfielder ropui De Bruyne a chhuak dawn lova, defensive midfielder tha ber Rodri erawh an chhawr zui ngei dawn bawk. Rodri hi tute tan pawh inngah ngamna a ni. Tlarhnung lamah ni se Manuel Akanji, Kyle Walker, Nathan Ake leh Joško Gvardiol te tuan a fum sawt dawn dawn hek lo.
City hian nipui bazar inhawng mekah Savinho chiah an la la lut a, Julian Alvarez an chhuahtir thung. Player hrawl la lut lo mah se an youth team atangin Oscar Bobb leh James McAtee te senior team-ah an kaisang ngei tura ngaih a ni. An ti nek nek anga season a tawp meuh chuan City bawk hi EPL champion niin, EPL-ah a zawna vawi nga champion thei hmasa ber an ni mai a rinawm.
- 2. Arsenal
EPL-ah season hnih chhung pahnihna ni zawn tawh Arsenal hi ‘Teuhsenal’ ni leh thei dinhmunah an ding. Supercomputer in Gunners hi season tharah pahnihna ni turin a lo a rinlawk tawh a, BBC Sport lam pawhin pahnihna ni turin an ring ve leh chiah bawk.
Season liam taa goal chhuah tlem ber Arsenal hian Bologna atangin Italy defender Riccardo Calafiori an la lut a, an tlarhnung an thuam chak leh zual. An mamawh left-back tha tak an neih vangin Arsenal tlarhnung a khawng lehzual hle tura ngaih a ni. Gunners hian defender an nei tha a, midfielder leh forward pawh an nei chhe lo viau. An buaina ber chu No. 9 potision luah tur tha, goal thun thei tak an nei lo hi an ni. He an buaina hi tih reh tumin hma an la a, Napoli forward Victor Osimhen lak tumin an hel thuak thuak a, Benfica striker Viktor Gyökeres an hmutai viau bawk. Tu emaw zawk zawk hi an la thei a nih chuan an buaina an sut kian theih a beiseiawm. Striker rintlak tak an nei a nih ngat chuan season tharah Laipui a puak ulh ulh reng tura ngaih a ni.
BBC Sport lam hian season liam taah pathumna Liverpool chu pathumna an nihzui an ring a. Season liam taa palina ni nawlh Aston Villa pawh palina an nih nawn leh an ring bawk. Heti a nih vang hian team lian Manchester United, Chelsea leh Tottenham te chu top 4 huang luah phak lo nawn leh turin an ngai tihna a ni.
Season liam taah FA Cup-a champion Manchester United chuan hma an sawn deuh dawrh tura ngaih a ni. Erik ten Hag ruai chhunzawm tur leh an squad thuam chak mek Manchester United hi season liam ta khan pariatna daih an ni a, season tharah chuan pangana ni thei tura ngaih an ni.
Nipui bazar inhawng mekah player pali an la lut tawh a, Leny Yoro (Lille), Joshua Zirkzee (Bologna), Matthijs de Ligt (Bayern Munich) leh Noussair Mazraoui (Bayern Munich) atangin an la lut tawh. Season tharah hmasawn ngei tumin an inthuam chak a, hmuhnawm zawkin an inlan zui ngei a rinawm.
BBC Sport in an rin lawk danin paruknaah Tottenham Hotspurs an awm ang a, pasarihnaah Chelsea an awm ang. Hetihlai hian championship atanga kaisang pathum; Southampton, Leicester City leh Ipswich Town te inham tang zo lova championship lamah an tlak leh ngal vek an ring. Supercomputer lam chuan Nottingham Forest, Wolves leh Ipswich Town te an tlakhniam a ring ve thung.
Champion tur inrinsiak te, chetha tur inrinsiakte hi football tihlutu leh tingaihnawmtu pakhat a ni a, inrinsiak lai period hi a nuam hranpa ve hrim hrim bawk. Rin lawk tam tak zingah ring dik an awm ang a, ring dik lo fe fe an awm bawk a. Rin lawkna kan tarlante hi Luka ziak tluka rintlak erawh a ni lo.