Manchester United chuan season thar atan an squad an thuamchak zui zel a, Bayern Munich atangin defender thar pahnih Matthijs de Ligt leh Noussair Mazraoui te an la lut
United hian Netherlands centre-back Matthijs de Ligt manah £38.5m an seng a, an hnena a khelh that dan a zirin £4.3m an pek belh leh a ngai dawn. Morocco defender Mazraoui manah hian £12.8m an pe phawt a, a khelh that dan a zirin Bayern hnenah £4.3m pek belh leh an ngai dawn. Erik ten Hag-a’n Ajax a enkawl laia an captain Matthijs de Ligt hi kum nga daih contract an ziahpui a. Ajax-a Ten Hag-a’n a enkawl tawh Mazraoui hi kum li daih contract an ziahpui ve thung. Luke Shaw a inhliam mek vangin Mazraoui hian United tan a khelh thuai rin a ni.
Old Trafford atangin Raphael Varane a inpuchhuak tawh a, Harry Maguire a tlahniam viau tawh bawk. Heti a nih vang hian United hian centre-back thar lak tur an dap a, England international Jarrad Branthwaite awt viau mah se Everton nen inremna an nei thei lo. Jarrad Branthwaite an lak mai theih loh vangin Erik ten Hag-a hriat chian sa Matthijs de Ligt lak tumin hma an la a, an la lut thei ta a ni. Juventus leh Bayern Munich-ah De Ligt hian beisei phak lo mah se amah hrechiang em emtu Ten Hag hnuaia khel tur a ni a, a vul thar theih a beiseiawm viau. Club leh tam tan tawnhriat nei tha tak a nih vangin United in a mana £40m vel bawr an seng hi man to a ni hauh lo.
United in defender thar pahnih an neih lai hian Aaron Wan-Bissaka chuan thawhlehni khan West Ham a zawm ve thung.