Tualchhung league lian leh ropui ber zinga mi Spanish La Liga 2024/25 chu August 15, Nilai zan khan khel tan a ni. La Liga season tharah inkhel hmasa berah Athletic Club leh Getafe te chu 1 – 1 in an inhnehtawk a. Nilai zana inkhel dangah Real Betis leh Girona te 1-1 bawkin an inhnehtawk ve bawk. La Liga 2024/25 hi zaninah khelh chhunzawm a ni dawn a, team lian FC Barcelona an inlan ang.
Champion tura rinkai FC Barcelona hian Mestalla -ah Valencia an luhkhung dawn. Barcelona tan hian Lamine Yamal a hmuhnawm leh viau tura ngaih a ni a, Euro 2024-a hming chher lian leh zual Yamal hi entu mipui mit fukna a nih a rinawm. Barca hi an manager thar Hansi Flick hnuaia an inlan hmasakna ber tur a ni a, manager thar hnuai an chetla hmuh a chakawm hle.
Inrinni zanah FC Barcelona an inlan laiin champion lai Real Madrid chu Pathianni zan hian an inlan dawn thung a, Pathianni zan lai dar 1:00-ah Mallorca hmachhawn turin Estadi Mallorca Son Moix ah an lenglut ang.