Tun hnaia AICC Office Headquarters, New Delhi-a All India National Executive and National Vice Chairpersons of Adivasi Congress Meeting-a tel, MPCC Treasurer hlui Zodintluanga Ralte chuan central lamah BJP an khih nasat thu leh, inthlan leh chu Congress sorkar hun a nih thu an sawi nasa hle tih a sawi.
Zirtawpnia Congress Bhavan-a ‘Friday Political Session’ neihah a zin report pein Zodintluanga Ralte chuan an meeting bul thut sawiin, India rama tribal te, BJP in an hneh tawhte lak let theihna turin India ram puma ‘Congress Election Manifesto tur ngaihtuaha thukhawm an nih thu a sawi a. “INC hian kum 50 chhung zet mai tribal-te kan enkawl tha hle a, tun hnaiah hmanraw chi hrang hrang hmangin BJP-te hian kan ‘vote bank’ te min chhuhsak a. Hei hi la let leh turin ruahmanna kan siam a ni, tih lam hawi hi kan thupui ber chu a ni,” a ti.
All India Congress Committee (AICC)-a All India Adivasi Congress National Executive Member ni mek Zodintluanga Ralte chuan a ngaih pawimawh bera chu party mi sawi aiin, New Delhi lama a sumdawng thiante sawi a nih thu sawiin, “New Delhi-a cham ta chu ka sumdawng thiante an lo kal a, Rahul Gandhi inthlak nasatzia te, a leadership hmasawn nasatziate an sawi a. Inthlan leh chu Congress sorkar hun a ni mai an ti,” tiin, a sumdawng thiante chuan BJP an khi nasa lutuk hian tun term an daih an rin loh thu te, Home Minister Amit Shah leh Uttar Pradesh Chief Minister Yogi Adityanath inngeih lohzia te an sawi duh hle tih a sawi.
Zodintluanga Ralte chuan, he meeting-ah hian tribal regiment dinte leh International Day of the World’s Indigenous Peoples” chu India-in pawm ve rawh se tihte an rel tih sawiin,, “Keini chuan ZORO kaltlangin UN-ah Indigenous rights buaipuiin kan lut thuk tawh tih ka sawi a, a tih dan turte pawh an hriat duh angin ka report nghe nghe,” a ti.
“AICC-ah hian Youth Congress kan nih laia kan thawhpuite G/S leh Secretary, MP ni laite an lo kat nuk a. Inkawmhona kan nei a, election awm leh hun huna sorkar turin an awm. Tuna state pathum inthlang turah pawh an boruak a sang a, an chapo loh thu erawh an sawi a, India ramah Congress hian hma a sawn a ni, ” Zodintluanga Ralte hian a ti bawk.