- Lallunghnema, Charity Lodge
Kan thupuia kan luh hmâin tun hnaia ka thil tawn leh buaipui nasat zual deuh deuhte ka’n ti ti pui lawk teh ang che u.
Kan Sawrkar chuan Buhfai Ration chungchangah Policy thar a zam a.Chu Policy Thar chu tihpuitlin a nih theih nan hmâ a la tan ta a. He Ration la thei tur chin bi tuk dan thar hi sum inrenchemna tha tak a niin consumerte tana tha tura ngaiin Centre For Consumer Education chuan kan thlawp thu leh zawm ngei tur a mipui kan duh thu Thuchhuah kan tichhuak a.Media hrang hrangah puanzar a ni.Hemi hnu lawkah LP Gas Biometric Authenticication chungchangah Centre For Consumer Education chuan Thuchhuah kan siamin kan tichhuak leh bawk a.Media kal tlangin kan puangzar bawk a ni.
Mimal taka ka buai pui ber, Consumer issue hi chawlhsan hleih theih a ni lova,tui luang angin kan hma chhawp hi a luang reng a.Complaint chi hrang hrang a lo luang lut reng bawk a ni.Ka lawmna pawh a zual zel a ni.Hetiang buaipui thei a Pathian hruaina ka chan avang hian ka lawm hle a,A hnenah pawh lawmthu ka sawi mawlh mawlh thin.Hemi kawngah hian ka thawhpuite ka fak hle bawk ; Pu Rohnuna te,Dr Maria-i te,Pu Sangpuia te hming hi ka lam lo thei lo a ni.Ka buaipui zinga a then a zar chauh….
Nu pakhat hian Television a lei a, chu TV lei chu a tha lova, a han report a, “Lo en mai mai rawh,”an lo tihsan ta mai a ni âwm e.A intham loh thlak khawp mai.He nu khawngaih thlak tak hian a harsatna hi min hrilh a.Consumer Protection Act 2019 tan chhanin kan ûm zui mek a ni.Complaint ka dawn dang pakhat chu ATM- a, rûk a pawisa inlaksaka inpuhna chungchang a ni a. Pakhat dang leh chu iPad Air tha lo siamtir(repairing) chungchâng a ni.
Khai aw, Kerela State-a Agarwal’s Eye Hospital chuan damlo pakhat K.Thangavel mit ding lam leh vei lam (eye) chu an zai sak(operated) a. Mahse vanduai thlak takin an zaisak Mr. Thangavel mit chu leh hnihin(left&right) a del ta hlauh mai a. He thil thleng avang hian mit zai sak Thangavel chuan he Private Hospital hi Coimbatore District Consumer Disputes Redressal Commission hmaah a khing ta a ni. He District Commission hian Medical Negligence ti a puhin hi compensation Rs. 5 lakh chawi turin thutlûkna a siam ta a ni. Hei bakah hian damdawiin a senso zawng zawng zat Rs. 53,987/- hi hospital hian complainant K. Thangavel hi a pe kir leh tur a ni. Commission a panna a a in senso zat Rs. 5000/- pawh a hmu tel tur a ni tih a ni bawk.
Medical Negligrnce case dang pakhat chu heti hian saptawngin a inziak bawk. “Patient, himself a doctor to get Rs. 6 lakhs for medical negligence by Delhi hospital” tiin.
Hetiang hi thil awm dan a ni,Delhi doctor pakhat kum 62 mi chu damdawiin medical negligence avangin a taksa pumpui a zen phah(complete paralyzed)a. Tichuan, Doctor hian a lungawi lohna chu thawi dam a nih theih nan Consumer Commission hmaah he Hospital hi a khing a ni.Delhi State Consumer Commission chuan Delhi Hospital hi thiam loh chantirin a hrem ta a ni.
Ka han âng dawn teh ang! Min lo hre thiam teh u.
Vairengte pawn lam thubuai remna chanchin ngaihnawm leh bengvar thlak sawi a tul leh thin a.Keini Mizo fate hi chu kan la thlaler chêt a. Consumerism lamah hian kan la hniamin kan la ngawng na lai lêng hle a.Kan lo inchhiar fin beiseina avangin he thu hi ka rawn pho chhuak a ni. Mahni ram ngeiah ka zûm zuk a, kan dawihzep êm êm a,kan harsatnate chu kan ngawihpui mai thin.Damlo inenkawl naah lungawi lo ila,Hospital lakah kan lungawi lohna kan thlen ngam si lo! Mihring dawih zep awm khawm kan ang ber e.Mahni hamthatna tur leh sum hmuhna turah chuan kan fing var em em lawi si.Kan changkanna hi kan âtna a ni a,kan âtna hi min timawltu a ni.
Hei chen hi consumer chungchang ka lo ziak ta! Ti tha ka inti hran lo,ka vei a,ka ti a ni mai.Tul ka ti a,ka thawk mai a ni.Min puntute tih beidawn ka duh loh avangin ka theih ang angin a tawp thlengin ka buaipui zel a, ka lo ûm zuisak thin. Complaint ka buaipuina man (fee) pawh ‘zero’ a ni.”Ukil angin sum la ve la chuan, i hui lût ve viau tawh ang a?” min titu an awm ve bawk. Kan hlawhtlinna erawh lawmthu sawiah a tâwp a, kan hlim veng veng zawk a ni.
Chawlhkâr lehah kan tî tî leh dawn nia! Ni tha, hun thar i tan inher chhuak mawlh rawh se.