Congress party chuan nimin khan thuchhuah siamin, tunhnaiah BSUP, Edenthar a cheng te vau na anga ngaih theih in Pu K. Sapdanga, Home Minister chuan Edenthar ZPM Group, Edenthara ZPM ho Whatsapp group ah a comment chu a social media ah thehdarh a ni a. Hetianga voters te vauna tawngkam ang hi tunhma in Mizoram Politic ah kan la hmelhriat ngai lova, hetiang thil a thleng hi a pawi kan ti hle, an ti.
BSUP kan tih, Basic Service to Urban Poor Scheme hi Central puihna hmanga Mizoram sawrkara UD&PA Department hnuaiah Aizawl khawpui chhunga in leh lo nei lo mi harsa zawk te tan in sak a ni a. Hmun 4, Durtlang, Edenthar, Rangvamual leh Lawipu ah te Congress sawrkar lai khan sak a ni a, chhungkaw 1096 chen theihna tur a ni, an ti a.
Edenthar BSUP hi tunhnaia Bye-Election neihna tur AMC Ward VI huamchhunga awm a ni a. An bialtu MLA, Home Minister ni bawkin anmahni rikrap leh vau ang zawnga tawngkam a nei hi mi rethei leh harsa zawk te hmuhsitna leh hnuaichhiahna, an duh duh vote thei tura zalenna an neih, Right to Vote palzut tumna ah kan ngai a. Model Code of Conduct bawhchhiatna ni mai lovin invauna(intimidation) a tel avangin Representation of People Act, 1951 bawhchhiatna a tling a ni, tiin.
Congress party in mirethei kan vau ve ngai lo va, mirethei sorkar kan din thin a, mirethei ten leirem an rah theih nan, mirethei te tan policy leh programme kan siam thin. Mirethei te vau hi kan tihve ngai loh a ni, an ti bawk.
Mizo thufingin, ‘Lal ngailo lal a na, an lal a kha,’ a tih ang khan, ZPM hian lal an hrawt a ni ber a, tawngkam pawh an duh chhe em em mai a. Sawrkar hnathawk te an puhchhe hle bawk a, hetiang sawrkar hi Mizoramah kan la hmun ngai lo. Hetiang kalphung hi em ni ‘KALPHUNG THAR’ kan ti a ni, an ti a.
Keini Congress party chuan BSUP a chengte thlavang kan hauh tlat dawn a, RIGHT TO VOTE , an duh duh vote theih tura zalenna an neih hi kan humhim sak tlat dawn a, an chunga vauna leh rikrapna te a thlen kan phal dawn lo a ni, tiin an thuchhuahah chuan an tarlang bawk.