- MC. Lalthianghlima
Ni 16. 8. 2024 ( Zirtâwpni ) ah khan MNF chuan an party General Headquarters office (Mizo hnam rûn) ah chhûng inkhawm neiin, hetah hian Dy. Chief Minister hlui Pu Tawnluia chuan thu a sawia. Pu Tâwna chuan ration card vâr (white) buhfai rate tih sân chungchangah ZPM ten thu diklo hmanga MNF an puh chu a ngaihthiam loh thu a sawia. MNF sorkar hnuaiah buhfai tih tona order copy a awm chuan Zoram mipui hmuh ah pho chhuak turin a ti bawk a ni.
Pu Tâwnluia chuan a sawi zêlna ah, ration card vâr (white) a buhfai leina rate tih sân hi MNF sorkar laiin supply department-in a ngaihtuahtu tur sub-committee a dina, chairman ah Dy. Chief Minister dahin, vice chairman-ah supply minister, secretary-ah supply secretary, member atân NGO aiawhte leh consumer affairs committee aiawh leh sorkar official-te ruat an ni a tiin a sawi. Pu Tâwna chuan “Uluk taka ngaihtuah a nih hnuin committee hian tih pun turin recoment (rawtna) a siam lova, cabinet-ah pawh report pêk luh a la ni lova, inthlan puan in a zui ta a nih kha, MNF hun laiin tih pun lohvin vawiin ni thleng hian a kal a ni. ZPM sorkar-in October 2024 atanga tih pun a tum avanga MNF min puh hi thu belhchian dawllo a ni a, khawiah nge MNF sorkar-in buhfai rate tih punna order a siam chu rawn lek chhuak rawh se, keini chuan mipuite dinhmun zir chiang chung zêlin buhfai rate hi kan sorkar chhungin kan ti punglo a ni” a ti a nih kha.
Pu Tâwna hian, “Uluk taka ngaihtuah a nih hnuin committee hian tih pun turin recoment (rawtna) a siam lova” a ti a.
Ni 20. March. 2022 (MNF Sorkar lai) a Zalên thuchhuah hi han ennawn leh ta ila, hetiang hian kan hmu a ni. “Mizoram sorkar chuan (MNF sorkar lai) buhfai-a sorkar sum hloh nasa lutuk tih ziaawm nân Non-NFSA (National Food Security Act) hnuaia ration card (card vâr) hmangtute’n buhfai an khulna man chu tih sân tumin ruahmanna a nei mêka, tih sânna tur zât erawh bithliah fel a la ni lo. tiin
“Zalên thu dawn danin Food Civil Supply & Consumer Affairs (FCS & CA) Department chuan tun dinhmuna card vâr/Above Proverty Line (APL) hmangte hnêna buhfai hralhna Kg ah Rs 15 chu tih sân tumin rawtna a nei a, card vâr hmangtute khul tur buhfai department-in state pâwn atanga leina chu Kg ah Rs 27.50 a nih laiin, ratailer atanga an khulna erawh Kg ah Rs 15 a ni.” tiin
Zalên in a tarlan zêl danin “APL ni lo, scheme dang AAY (card eng) , PPH (card hring/pawl) hmanga retailer atanga buhfai khulte chu central sorkar-in man tlâwma buhfai an khulna tur (subsidy rate) ruahmanna a siam fel sa vek a, hetih lai hian “card vâr hmangte buhfai khul tirna man tih sân a nih chuan, buhfai leina a sorkar sum hlohna tam tak a phuhruk theih beisei a ni.” tiin an chhuah bawk. “Hemi chungchang hi assembly budget session neih zawh takah khan supply minister Pu K. Lalrinliana pawhin lo sawi tawhin, a rate bithliah kawngah rawtna nei turin member-te a lo sawm tawh bawk. Thu dawn danin card vâr/APL scheme bîk hnuaia ration card hmangtute chungchang chu state sorkar-in mipuite dinhmun thlira a kalpui niin, card vâr hmangtute buhfai khulna tur rate pawh state sorkar-in ruahmanna a siam tur a ni.” tiin.
Pu Tâwna hian, thil ngaihtuah chiang tâwk lo leh vai ruaiin thu a sawi niin a lang. A kaihhruai sub committee khan tih pun turin rawtna an neih leh neih loh chu thuhran. Buhfai khulna rate tih sânna tur ruahmanna chu MNF sorkar hnuaiah khan ruahman ngei a ni, order an chhuah hmanlo mai zawk a nih hmel. Ni 20. March. 2022 ah Zalên in chiang takin a tarlanga MNF sorkar-in National Food Security Act hnuaia ration card vâr hmangtuten buhfai an khulna man chu tih sân tumin ruahmanna an neih mêk thu chu chiang takin a tichhuak daih tawh zawk a ni. Zalên in a tarlan zêl dan chuan, “Card vâr hmangtute buhfai khul tirna man tih sân a nih chuan, buhfai leinaa sorkar sum hlohna tam tak a phuhruk theih beisei a ni” tih a ni bawk.
Heta thil lang chiang ta em em chu MNF sorkar khan, ration card vâr hmangtute buhfai khulna man chu tih sân tumin ruahmanna thui tak a lo nei a, rin aia hma ah inthlan puan a nih tâk avangin a takin an ti puitling hman ta lo niin a lang chauh zâwk a ni.
Pu K. Sangthuama supply minister hlui pawhin, ration card vâr hmangtute buhfai khulna tur rate tih sân chu tha a tih thu leh a tlawp thu a lo sawi tawh bawk a nih kha. Tin, he thil hi politics-a inbeih chiamna tur pawh a ni heklo, ration card vâr, mi awmthei zawkte awmna turah mi rethei zawkte awm tlat chhanchhuahna tur a ni zawk.
Chhungkaw khawsak zia awm ration card vâr hmangtute’n sorkar atanga buhfai subsidy-a an leina man tih sânna turah hian, chhungkaw harsa zawkte’n ration card eng leh card pawl hmangtute a huam lo tih hi hre nawn leh ila, thil diklo siamremna tur thil a ni zawk. Keini chhûngkaw khawsak harsa zawkte tân phurrit tur a awm lo tih hi i hria ang u.