Pathianni zan khan EPL-ah inkhel ngaihven hlawh tak a awm a, champion lai Manchester City chu Chelsea hmachhawn turin Stamford Bridge-ah an leng lut. Stamford Bridge a inkhel hmuhnawm takah City in si hnih faiin hnehna an chang a, team lian lakah point thum an hmu. City tan hian Erling Haaland chuan goal a thun nghal.
Season liam taa beisei phak lo Chelsea hi manager thar Enzo Maresca hnuaiah a vawi khat nan an inlan a, an mualah an khel chhe lem lo viau. Nipui bazar inhawng mekah player thar la lut nual tawh mah se City lakah an player thar bul tan an awm lo. Leicester City atanga an lak luh Kiernan Dewsbury-Hall leh Wolves atanga an lak luh Pedro Neto te bench atangin lut bawk mah se danglamna thlen tur khawpin a che fuh thei lo thung. Hetihlai hian Manchester City tan an player thar Savinho chuan rin loh takin bul a tan a, nipui bazar inhawng mekah an lak luh awmchhun ni rih Savinho hi a chetha nghal viau nghe nghe. An player pawimawh Rodri a inhliam vangin rawlthar Rico Lewis chuan bul a tan a, team lian lakah kum 19 mi hi mit la takin a inlan.
Inkhel ngaihven hlawh takah hian Manager thar Enzo Maresca hnuaia inlan Chelsea in bul an tan tha lova, goal an chhuah thuai. Inkhel tan atanga minute 18-naah Erling Haaland chuan City hmahruaina goal a thun. City hmahruaina goal thuntu Haaland hian EPL-ah season hnih chauh hun a la hmang a, tum hnih ngawt top-scorer a ni der tawh. A zawna vawi thumna top-scorer nih a tum leh dawn a, a tum a puitlin thei a nih chuan EPL chanchinah a hming a dai leh ngai tawh lo vang. Haaland hian City a zawm hnuah EPL-a big 6 lakah goal 15 zet a thun tawh a. EPL-a a inlan ve hnuah team lian lakah goal thun thei ber a ni a, a hnuai chiahah hian Big 6 laka goal 12 thun tawh Mohamed Salah a awm.
Champion lai City lakah si an phurh hnuin Chelsea an khel tha sauh a, an mikhual ten na taka an nawr karah an him hram zel a, tha takin an khingpuite an nawr let. City player hlui Cole Palmer pet kawh zet mai chu City si nghak Ederson-a’n dang zet mah se ball per let leh hi Nicolas Jackson chuan goal ah chantirin an si phurh a sut. Goal thuntu Jackson hi a lo offside vangin a goal thun hi hnawl a ni thung. Inkhel hmuhnawm takah goal a luh belh thei mai lova, City in 1-0 a hmahruai chungin chawlhlawk an hmang.
Chawlhlawk hnu lamah City an khel tha chhunzawm a, goal hmahruai thuntu Haaland-a’n goal a thun belh leh teuh hle a, a pet kawh zet chu Blues si nghak Sanchez-a’n a dansak hlauh thung. Goal thun tumin an innawr nasa viau naa hun rei tak chhung goal a luh belh thei lo. Goal a luh belh theih loh reng hnuin Chelsea midfielder hlui Mateo Kovacic chuan minute 84-naah pui zetin an goal hnihna a thun a, an hmahruaina a tizau. Kovacic hian a team hluite laka zahna lantir nan a goal thun hi a lawm chiam duh lo. Kovacic goal thun hnu hian goal dang a luh belh thei tawh lova, Manchester City chuan Chelsea lakah point thum an hlawhchhuak ta a ni.
Stamford Bridge a inkhel hmuhnawm takah hian a club hlui Chelsea laka chetha tak Mateo Kovacic chu ‘player of the macth’ ah thlan a ni.
An mikhual Manchester City lakah tlawm mah se Chelsea an khel chhe lo viau a, manager thar Enzo Maresca hnuaiah hmasawna hmuh tur a awm. Champion lai leh champion leh tura rinkai ber Manchester City ber kher hmachhawn lo se Blues hian point thum an hmuh theih ngei a rinawm.
Pathianni zana inkhel dangah Brentford chuan an mikhual Crystal Palace chu 2-1 in an hneh. Brentford tan hian Bryan Mbeumo leh Yoane Wissa ten goal an thun a, an player tho Ethan Pinnock chuan an lamah a tilut bawk. Palace an hmachhawn tum hian Brentford player pawimawh Ivan Toney chu squad-ah telh a ni lo. Squad-ah telh a nih loh chhan hi club dang atanga dawrtu a neih vang nia sawi a ni a. Saudi Pro-League club Al-Ahli in Toney hi lak tumin an dawr mek a, EPL club dangte pawhin an ngaihven tho bawk.